KUCHING: Perintah Nengeri ngagihka belanja RM4 juta ngagai sekula peribit China di Sarawak ungkup taun tu.
Kepala Menteri Datuk Patinggi Tan Sri Adenan Satem madah, penyampau nya nambah enti dibandingka RM3 juta ke diberi ngagai 14 buah sekula peribit China ba taun ke udah.
“Kitai bela nemu komuniti China beratka pekara pelajar, taja pia sekula peribit semina nerima agih belanja ke mit ari perintah besai.
“Meretika pekara nya, perintah nengeri udah ngagih RM3 juta ba taun ke udah lalu ba taun tu kitai nambah penyampau nya ngagai RM4 juta ungkup sekula peribit China,”ku iya.
Iya mansutka jaku nya ba ‘Majlis Ramah Taman Tahun Baharu Cina (TBC)’ ke diatur Majlis Bandaraya Kuching Selatan (MBKS) lalu dipenyadi Menteri Besai Datuk Seri Najib Tun Razak enggau bini Datin Seri Rosmah Mansor ditu, malam ensanus.
Adenan nandu, agih nya dikena mantupka pinta Chairman Kaunsil Sekula Peribit China Sarawak, Temenggung Vincent Lau enggau Chairman Komiti Sekula Sekondari Chung Hua No.1, 3 enggau 4, Richard Wee, ti minta agih belanja ditambah taun tu.
Ngenang kaul bukai, Adenan madahka perintah nengeri diatu benung berunding enggau Kompeni Mekal Lekterik ngambika tau ngurangkas caj lekterik ungkup pengawa komersyel enggau industri.
“Kitai udah ngurangka caj lekterik ungkup ke dikena domestik lalu diatu kitai merunding deka ngurangka caj ungkup pengawa komersyel enggau industri,”ku iya.
Adenan mega ngarap komuniti China ulih meri kerejasama munaska pengawa salah enchuri batang di nengeri tu.
Ku iya, mensia mayuh patut meri kerejasama ngeriput sebarang pengawa ke bisi kaul enggau penyalah nya.
“Seagi aku mengkang ditu, aku enggai meda penyalah nya majak nyadi tang aku begunaka tulung ari kita semua, ngeriput penyalah nya,”ku iya.
Bela datai Datin Patinggi Datuk Jamilah Anu, Sapit Kepala Menteri Datuk Patinggi Tan Sri Alfred Jabu Numpang sereta bini Dato Sri Empiang Jabu, Datuk Bandar MBKS Datuk James Chan enggau menteri kabinet bukai.