LUNDU: Datuk Patinggi Tan Sri Adenan Satem patut terus disukung sereta dipilih nyadi Kepala Menteri (KM) Sarawak dalam beberapa penggal ti deka datai.
Sapit Menteri Datuk Sri Wan Junaidi Tuanku Jaafar madahka, nya dikena nentuka polisi tauka agenda ti dikemeran sereta dikemeratka KM nya mujur sereta meri pemanah enggau penguntang ngagai rayat serata menua.
Wan Junaidi berebak enggau tu mega muji pemerani Adenan ti bejalaika polisi ti enda nadai kala dipejalaika pemesai bukai di menua tu.
“Iya (Adenan) udah mai chara tauka jalai ti baru. Mayuh pekara baru ditumbuhka ti dipelabaka enda kala dirunding raban bansa. Chara tauka jalai ke dipejalaika iya dalam timpuh 12 bulan ke udah, udah ngerikuka sejarah baru dalam menua kitai.
“Nya alai kitai rayat patut terus nyukung iya (Adenan) ngambika ukai semina nyadi kepala menteri seiti penggal aja tang ke beberapa penggal ti deka datai.
“Laban kitai deka ke semua agenda tauka polisi ti disebut iya (Adenan) baka mengeri endang udah mansang tang kitai deka mai pemansang nya ngagai menua pesisir ngambika rayat pesisir sama ngasaika penguntung,” ku Kaban Parlimen Santubong nya.
Wan Junaidi mansutka pekara nya lebuh bejaku ba ‘Majlis Pemimpin Bersama Rakyat’ nyerumba Taun Baru China, ti diatur ba Dewan SJK Chung Hua Lundu ditu, ngalih hari kemari.
Pengerami nya kemari mujur dipenyadika Kepala Menteri Datuk Patinggi Tan Sri Adenan Satem, ti mega bisi disempulang bini iya, Datin Patinggi Datuk Jamilah Anu.
Nyerumba pengerami nya kemari, Adenan mega dikerami genap setaun iya udah nyadi Kepala Menteri.
Kelimpah ari nya, Wan Junaidi madahka diri temegah ati ngagai Jamilah laban ti meruan nyukung Adenan lebih agi sepemanjai ke mangku penuduk kepala menteri.
“Kami amat temegah ati ngagai bini iya (Datin Patinggi Datuk Jamiliah Anu) ti seruran meri jaku peransang ngagai iya (Adenan) lalu nya mega nyadika peranagsang ngagai kami bukai,” ku iya.
Berebak enggau tu, dalam jaku pengelalau Chairman pengatur pengerami nya Chen Chung Yee madahka SJK Chung Hua Lundu bisi blok begunan baru sereta begunaka belanja dikena ngemujurka projek nya.
“Blok baru tu bisi 8 kelas sereta beungkus RM1 million dipelabaka tembu ujung taun tu sereta dikearapka ulih dikena lebuh sekula dibuka taun 2016. Ngarapka perintah nengeri ulih bantu dikena bejalaika projek nya,” ku Chen.