KUCHING: Palan dagang beatap sereta begunan endur engkah entukar beringkat entara sekeda projek ti deka dipasuk dalam renggat kedua projek infrastruktur di Medan Niaga Satok.
Menteri Kereja Raya ke mega Kaban Parlimen Petra Jaya Datuk Sri Fadillah Yusuf madah palan beatap nya ila deka ngelantangka orang dagang ti datai ari jauh maya ujung minggu kelimpah ti ngelantang orang ke datai bebeli barang.
“Penemuai Menteri Besai Datuk Patinggi Mohd Najib Tun Razak ke Medan Niaga Satok sigi diatur ketegal projek palan dagang tu diadu nengah kerejasama perintah besai enggau perintah nengeri.
“Tebal agi belanja ungkup projek tu datai ari perintah besai sereta dibantu perintah nengeri nengah Dewan Bandaraya Kuching Utara (DBKU) enggau ejensi bukai.
“Najib ulih meda penengkeman sereta pejalai palan dagang tu,’ku iya lebuh dikerandau pemberita ba Medan Niaga Satok kemari.
Fadillah madah, ba renggat kedua projek, palan beatap endur pasar tani tauka orang dagang ti mai asil kampung deka digaga sereta meri pengelantang ngagai orang luar ke datai maya ujung minggu.
“Kitai ngarap pengawa ngaga atap nya ulih dipungkal dalam bulan Mac tauka bulan Mei, pemadu laun.
“Palan tu mengkang deka dikemanah, ketegal nya kitai mai Najib kitu ngambika iya ulih meda kediri empu.
“Tembu renggat kedua ila, Medan Niaga ngembuan perengkaguna ti chukup ke alai kitai deka bisi palan endur ngengkah entukar beringkat, palan beatap endur orang dagang ke datai ba ujung minggu,”ku iya.
Medan Niaga tu ila deka bisi palan endur bemalam, mandi, surau enggau semua perengkaguna, tandu iya.