SIBU: Gerempung Industri Rikoding Dayak Sarawak (PERISAI) ngansak Opis Menteri Dagang Dalam Menua (KDN), Opis Menteri Gerempung Kerejasama enggau Pekara Bebelika Barang (KPDNKK) di nengeri tu ngemeratka nasit ke ditapi industri muzik Dayak.
Presiden PERISAI Embat Lala madah, ari mayuh tegah ke bisi digaga KPDNKK di sekeda kedai VCD, asil rampas semina VCD Bollywood, Hollywood, filem China sereta mayuh agi ke bukai, jarang dipeda VCD Lagu Iban, Dayak ke dichelak.
“Kami inginka pengibuh. Anang ngaga kami baka utai ngapa indah enda baka jaku sempama ‘nyumbuh di kampung diberi tusu, anak di rumah mati kebeluran’.
“Nama tuju KPDNKK semina meri tumpu nyaup nagang pengawa nyelak tiru VCD bukai ke endang udah ditemu kaya, kapa deka kiruh agi.
“Nama kebuah enda nyaup industri muzik menua diri empu ke chukup begunaka sukung ari KPDNKK dikena nyapai pemujur enggau pemansang.
“Indah enda baka KPDNKK enda beamat nulung sereta nyaup industri muzik Iban tajapan sida ngembuan kuasa penuh dalam pekara nya,” ku iya.
Iya madah munyi nya lebuh bejaku ba sebengkah awak beserimbai enggau pengawa bejadika Bengkel Hakcipta Sibu ke diatur Perbadanan Harta Intelek Malaysia (MyIPO) enggau PERISAI ditu, kemari.
Beduduk ari jenayah chelak tiru ke majak ngerembai, mayuh kompeni rikoding sereta penempa lagu Dayak nyau deka bankrap berindik ari penanggul tu.
“Nama agi utai dianti KPDNKK. Sida ngembuan kuasa bekaul enggau penanggul tu. Putarka pekara tu enggau lengkas sereta lebih chakah. Tajapan bisi atur digaga KPDNKK sebedau tu dikena nagang jenayah chelak tiru, tang lalau nadai mandangka pemujur. Jenayah chelak tiru mengkang nyadi nyentuk ke seharitu,” ku iya.
Embat ngarapka PERISAI ulih ngatur sesi berandau begulai enggau KPDNKK, Komiti Penapis Filem (FINAS) sereta MyIPO dikena mutarka penanggul jenayah chelak tiru VCD dalam industri muzik Dayak pemadu nadai setaun sekali.
“Di Sarawak, kitai ngembuan urung 27 buah kompeni rikoding lagu Dayak. Nya alai, chukup beguna semua pengempu kompeni nya nyeretai PERISAI sereta seruran nitihka penerang ke baru.
“PERISAI nyadika pelasar dikena kita sama nyingkang nempa pemansang sereta nyadika payung dikena ngelindung industri muzik Dayak,” ku tandu iya.