Adenan seiku pemesai ke siru sereta ngemeratka hak rayat

0

MIRI: Penerit atur ke dikemeranka Kepala Menteri, Datuk Patinggi Tan Sri Adenan Satem dalam mutarka pengawa salah nebang kayu enggau nadai pemendar sereta nagang penatai sebarang orang ke ngembuan runding ti ekstremis ngagai nengari tu paut dipuji sereta disukung rayat.

Seiku aktivis rama, Wan Zain Syed Mohdzar nyemaka Adenan seiku pemesai ke chukup siru sereta ngemeratka rayat ke alai iya enggau naka ulih nyaga hak rayat di nengeri tu.

“Semua raban kabinet sebedau tu udah besumpah nyain semaya integriti ba mua Komiti Nagang Pengawa Makai Suap (SPRM) ke alai sida deka bejalaika pengawa enggau lurus dalam perintah nengeri,” ku iya.

Kelimpah ari nya, pemerani Kepala Menteri dalam ngepunka atur sereta neritka adat dikena ngemunaska pengawa makai suap dalam perintah nyengkaum nagang pengawa nebang kayu nadai pemendar ari terus ngelekai di nengeri tu sebengkah atur ke chukup badas.

“Kitai chukup besetuju sereta nyukung atur ke dipunka Kepala Menteri ti ke-5 tu ke deka meda semua kampung di nengeri Sarawak dijaga enggau manah sereta likun ari sebarang pengerusak ketegal ti diteresa piak enda beradat,” ku iya.

Kenu ku Wan Zain, perintah nengeri mega nagang penatai orang ke ngemai runding ti eksterimis ke disemakaka baka ‘virus’ ke tau nganchurka pengelikun, penyerakup sereta kaul manah ke lama udah dikemeranka rayat pupu bansa di nengeri tu kenyau ari suba.

“Aku enggau ati ti chukup tebuka nyukung atur ke dikemeranka perintah nengeri dalam nagang penama sebarang piak enda beradat tauka eksterimis tama ngagai nengeri tu,” ku tandu iya.

Iya madah munyi nya lebuh ti meri penemu iya bekaul enggau penyulut ke ditempa perintah nengeri Sarawak ke diketuai Kepala Menteri Datuk Patinggi Tan Sri Adenan Satem ke alai iya udah manggai pengelama setaun bejalaika pengawa nyadi kepala menteri.

Kenu ku iya, Adenan mega ngemeratka penyiru nagagi rayat nengah chara ngurangka tarif elekterik dalam nengeri nyentuk ngagai 40 peratus ke dipeda ulih ngelempungka tating pengidup rayat.

“Semua rayat di nengeri Sarawak beterima kasih ke pemanah sereta penyiru Kepala Menteri,” ku iya.

Nangkanka nya, konsep runding tebuka ke dikemeranka Adenan mega meri awak ngagai rayat dalam ngenataika sebarang penanggul ke ditapi terus ngagai perintah.

“Kitai mega ngarapka pengari rayat Barisan Nasional (BN) lebih suah turng padang dalam ngrempitka kaul enggau rayat sereta ngelala sebarang bansa penanggul ke ditapi ngambika penanggul nya ulih dikenataika terus ngagai Kepala Menteri,” ku iya.