DNC minta komiti nya mendingka penemu Adenan seraya nitihka peneka komuniti Dayak
KUCHING: Kepala Menteri Datuk Patinggi Tan Sri Adenan Satem nerima puji ari sebengkah Gerempung Ukai Dikuasa Perintah (NGO) Kongres Kebangsaan Dayak (DNC) laban udah ngayanka penyiru iya ba semua bansa Dayak berindik ari pemutus iya nukar leka jaku ‘Lain-lain’ ngena ‘Dayak’ dalam semua pom perintah baik nya ba renggat perintah besai tauka nengeri.
“Kitai amat gaga sereta ngasaika pemutus nya mandangka basa ti tinggi ari seiku ketuai perintah nengeri baka Kepala Menteri nya,” ku presiden DNC Mengga Mikui (gambar) pengudah Aum Komiti Pusat kongres nya kemari.
Lebuh maya diinterbiu RTM malam 26 Februari, Adenan madah, iya nadai penanggul enti semua komuniti Dayak deka ngena nama ‘Dayak’ kena nganti ‘Lain-lain’ dalam semua pom perintah.
Adenan madah, sida tau ngena nama ti dikedeka lalu peneka sida milih ni nama ke patut ku sida.
Mengga ngasaika respon positif ari Adenan nya mandangka iya bebasa sereta ngelala asai ati komuniti Dayak ke ngelama tu minta leka jaku ‘Lain-lain diganti ngena ‘Dayak’.
“Lebih 50 taun pengudah merintah diri nengah penumbuh Malaysia dalam taun 1963, bansa Dayak dikelala ngena nama ‘Lain-lain’ ke nadai ditemu pun ujung.
“Nadai kebuah kitai ke tebal agi nguan Sarawak tu disebut ‘Lain-lain’,” tandu iya seraya madah, ketegal sukung bansa Dayak mih Malaysia bisi diatu.
“Dayak tu mih bansa asal di Sarawak ke dikelala raban antrofologis beratus taun ke udah lalu leka jaku ‘Bumiputera’ nadai mandangka bansa seseiku orang nya.
Mengga mega ngelalau ‘Bumiputera Minorities Technical Committee’ (BMTC) ke betuaika Menteri Bekebun Bedandang Besai enggau Komoditi Datuk Seri Douglas Uggah enggau Menteri Energi, Teknologi Gadung enggau Ai Datuk Seri Dr Maximus Ongkilili, mendingka penemu Adenan ke nadai penanggul ba leka jaku ‘Dayak’ dikena nukar ‘Lain-lain’ dalam semua pom perintah.
Perambu BMTC ke deka ngena ‘Bumiputera’ nganti ‘Lain-lain’ nerima bantah ari NGO Dayak sereta Nembiak Parti Rayat Sarawak (PRS)
Ku Mengga, bansa Dayak enggai dikumbai ‘Bumiputera’ laban nya semina dikena lebuh nengkebang Polisi Ekonomi Baru (NEP) urung taun 1970 menya.
Mengga mega minta semua pemesai bansa Dayak nyukung penemu DAP Sarawak ke merambu deka bejuraika isu nya maya Aum Kunsil Nengeri ti deka datai tu.
Sebarang tanya pasal pekara ti dipansutka DNC dalam penerang tu tau dituju ngagai sekretari besai gerempung tu, Richard Lias ba lumur 016 5759383.