PAKAN: Semua ketuai parti dalam gempung Barisan Nasional (BN) nyengkaum pro-BN dipinta bekerejasama enggau pangan diri dikena nempa mayuh agi pemujur maya pengawa bepilih kunsil nengeri (PRN) ti deka datai.
“Sukung ke tegap ari semua kaban BN dalam semua renggat nyadika pelasar kena perintah BN ngetanka pemujur sereta penyulut menua nyerumba juluk menua mansang manggai taun 2020,” ku Menteri Pemansang Rama, Tan Sri William Mawan Ikom.
Mawan ke mega Kaban Kunsil Nengeri (ADUN) Pakan sereta Kaban Parlimen (MP) Saratok madah munyi tu lebuh bejadika Program Pemansang Raban Bansa ke diatur Opis Pelilih Menua Meradong Julau di Rumah Mok Gelut, Lasi Julau, Hari Enam tu tadi.
Urung 400 iku mensia sereta 50 iku Tuai Rumah di serata pelilih menua nya ngulu program ke diatur sepemanjai sehari nya.
Dalam program nya, Mawan ke mega Presiden Parti Tenaga Rakyat (TERAS) nerima 620 peminta ari rayat ke deka masuk nyeretai parti nya ari 20 buah rumah panjai di Balut, Merurun sereta Lasi.
Pom peminta nya disuaka raban tuai rumah ari 20 buah rumah panjai nya ngagai Mawan.
Lebuh ti meri jaku timbal iya bekaul enggau parti TERAS, Mawan madah, parti nya seruran nyingkang begulai enggau BN ke alai lima iku raban kabinet ngeluanka parti nya.
“Kami ngarika perintah BN deka mantu rayat enggau naka ulih dikena meri lebih mayuh pengelantang sereta pemansang nengah serakup ke rat,” ku iya.
Beserimbai enggau program nya, Mawan bisi nyuaka bantu RM20,000 nagagi Komiti Pemansang enggau Pengelikun Genturung Pendiau (JKKK) Rumah Mok Gelut.
Sama bisi datai, Pemesai Opis Pelilih Mit Julau, Mohd Said Atoi, Pemesai Opis Pelilih Mit Pakan, Alex Liau, Sekretari MJDC, Adrian Luang, Ketuai Balai Polis Julau, DSP Bidol Noyeng, Pemesai Perhubungan Opis Pekara Khas (JASA) P.209 Julau, Sylvester Embuas, tuai-tuai opis sereta bala tuai raban bansa bukai.