SIBURAN: Parti Keadilan Rakyat (PKR) deka nganjung pengari bediri ba tiga sitak Dewan Undangan Nengeri (DUN) ke baru, Mambong, Tarat enggau Serumbu maya pengawa bepilih negeri (PRN) ke disadang deka diatur sebarang maya sebedau Jun 2016.
Berindik ari nya, Menteri Besai Selangor Dato Azmin Ali madah PKR (Sarawak) diatu udah chukup sedia napi PRN nya.
“Aku deka madah ngagai Barisan Nasional (BN) Nengeri Sarawak, PKR udah sedia napi pengawa bepilih.
“Baik nya diatur ba minggu ti deka datai, PKR udah sedia…tauka ba bulan baru tu, PKR udah sedia , sekalika diatur ba taun ti deka datai… PKR lebih agi sedia,” ku iya.
Azmin mansutka jaku tu rambau pengawa bejadika penumbuh Palan Servis PKR pampang Mambong di Siburan ditu, kemari.
Dikena nentuka PKR teulihka pemujur ba ketetiga sitak baru nya, Azmin ngansak rayat Sarawak kelebih agi raban nembiak mai ubah di nenegri tu lalu anang sekali kiruhka jaku ari raban BN.
Ku iya ngelalau, raban dalam BN kelebih agi UMNO, anang bemain sentimen Semenanjung Malaysia, Sarawak enggau Sabah.
“Enti nadai Sarawak…nadai Malaysia. Bebasaka peranak Sarawak, orang Sarawak bisi rega diri lalu hak sida patut ditan.
“Chalun kitai ba sitak Mambong Willy nama iya, ukai aku. Willy ukai datai ari Gombak tauka Shah Alam …Willy peranak asal, orang Bidayuh ari Mambong.
“Kitai deka meri bantu ungkup pemujur PKR,” ku iya nandu.
Iya nambah, pemujur PKR di Sarawak chukup beguna dikena nentuka parti nya ulih nguasa perintah besai di Putra Jaya.
Semina enti PKR megai kuasa di Putra Jaya kitai ulih meri pengelantang ngagai nengeri Sarawak, tandu iya.
Iya nambah, PKR deka nentuka royalti minyak ba penyampau 20 peratus diberi ngagai Sarawak enti PKR bekuasa.
“Kelimpah ari nya PKR deka nentuka peranak asal Sarawak mangku pengawa besai ba opis perintah lalu rayat Sarawak deka beri hak nitihka pematut,’ku iya.
Bela datai Chairman PKR Nengeri ke mega ADUN Ba’kelalan Baru Bian.