MIRI: Pengawa meri nama ‘Keling’ enggau ‘Kumang’ ba dua iku anak burung Kenyalang ke baru ada ti digaga seiku raban komiti Piasau Nature Reserve (PNR), Musa Musbah ngenyima sereta ngasuh raban bansa Iban ditu enda puas ati.
Nitih penerang, pekara tu ukai semina ensiban ba ati genap bansa Iban, tang mega bejai sereta enda bebasaka adat tauka pengarap asal bansa Iban di serata nengeri tu.
PNR ngamahka gelar ‘Keling’ kelai bujang berani bansa Iban sereta gelar ‘Kumang’ nya ngembuan reti kena ngelai nama bini ‘Keling’, tang ke bendar lebih ari nya.
“’Keling’ enggau ‘Kumang’ datai ari menua Panggau Libau (pendiau petara), nya alai seduai iya tu Petara bansa Iban sereta enda patut disempamaka sama enggau jelu,” ku seiku aktivis rama bansa Iban, Bill Kayong.
“Ambika chunto, enti sida enda ulih bebasaka adat enggau pengarap bansa Iban, aku mega irauka semua raban bansa Iban deka malas pekara ke sama ba sida nengah chara enda bebasaka pengarap sereta adat bansa bukai.
Bakani enti raban bansa Iban meri nama jelu ke ditupi sida ngena nama pemesai pengarap tauka pemesai adat? Nama asai runding sida?,” ku iya.
Nya alai, beduduk ari pekara tu, Bill minta Musa nginsil nama ‘Keling’ enggau ‘Kumang’ ke diberi ngagai dua iku anak burung Kenyalang sereta ngansak iya minta ampun chara tebuka ba mua mensia mayuh laban ulah nya dipeda udu ngenyimaka ati semua raban bansa Iban.
“Enti pekara tu enda dikemerat, kami deka ngaga ripot polis bekaul enggau pekara tu dalam timpuh beberapa hari tu laban pekara tu chukup ngenyimaka ati tiap iku raban bansa Iban,” ku iya nandu.
Ku Bill, Musa patut ngaga pansik enggau silik sereta belajarka pun penatai ‘Keling’ enggau ‘Kumang’ sebedau nguna kededua nama nya sepeneka hati.
Kededua nama nya ngembuan reti ke chukup besai dalam raban bansa Iban ke alai nama nya semina dikena dalam pengerami tradisional bansa Iban di serata nengeri tu.
“Musa patut berunding panjai enggau bala pemesai raban bansa Iban ke ngembuan penemu bekaul enggau pengarap tauka adat bansa Iban, ukai peneka ati nguna nama ‘Keling’ enggau ‘Kumang’ dalam sebarang pengerami ke nadai bekaul enggau adat Iban,” ku iya.