SELAMAT DATAI: Kepala Menteri enggau bini iya dikelalu ngena adat basa besai ba atur pengawa nya.
MIRI: Kepala Menteri, Datuk Patinggi Tan Sri Adenan Satem minta semua rayat di nengeri tu nyukung juluk ati iya ke deka meri tumpu ngagai pemujur, pemansang sereta pengelikun semua rayat di nengeri tu.
Iya mansutka jaku nya ba mua urung 3,000 iku mensia ke bisi ngulu pengerami Taun Baru China (TBC) ke diatur parti SUPP di Eastwood Valley Golf and Country Club (EVGCC) kena Hari Minggu tu tadi.
“Tu ukai juluk aku kediri, tang juluk kitai semua kena ngangkatka nengeri Sarawak ngambika mujur dalam semua pengawa.
“Kitai udah nempa mayuh macham pemujur enggau pemansang taun tu,” ku iya.
Berindik ari nya, Adenan minta semua rayat mengakang meri sukung ngagai iya sereta meri timpuh lima taun agi dikena iya mangku pengawa nyadi Kepala Menteri enti deka ngasaika mayuh ubah pemansang ke tau nguntungka semua rayat.
“Kitai ngembuan kaul ke manah enggau perintah besai menua Malaysia, aku nemu bakani chara nguna semua perengka, pengaya sereta pengeraja ke dikembuan nengeri tu dikena ngemansangka nengeri Sarawak tu.
“Tambah mega kitai diau ari baruh parti ke sama (BN) sereta sama organisasi.”
Kelimpah ari nya, iya mega madahka mayuh perambu pemansang udah digaga ungkup nengeri tu.
Bekaul enggau status raban bansa China di nengeri Sarawak, iya minta raban bansa tu anang saru laban sida endang peranak menua Malaysia ke sah sereta mega ‘Anak Sarawak’.
Iya mega mantaika pengaga ati beduduk ari pemujur peminta raban bansa Dayak ke minta gelar ‘Dayak’ dikena dalam semua pom perintah kena nukar gelar ‘lain-lain’ ke diguna sebedau tu.
Bejaku ngenang tarif rega lektrik, Adenan madahka aum sereta pejurai penemu bekaul enggau peminta ngurangka tarif lekterik domestik udah digaga.
Diatu, Adenan benung berunding enggau kompeni Sarawak Energy Berhad ngambika tarif lekterik ungkup sukut industri enggau komersial mega diturunka deka dipansutka dalam aum Kunsil Nengeri (DUN) dalam bulan april taun tu.
Taja pia, iya minta ampun ngagai rayat di nengeri tu bekaul enggau royalti minyak 20 peratus ke dipinta perintah nengeri ungkup nengeri tu enda dikemendarka piak Petronas, peminta nya enda nerima pemendar.
Tang ku iya, piak Petronas besemaya deka ngungkupka kontrak beungkus RM2.1 bilion ngagai kompeni Sarawak sereta besemaya deka ngurangka ungkus dikena ngaga Maktab Sains enggau Kolej teknikal enggau Vokasional urung RM50 juta di nengeri tu.
Iya meri besai terima kasih ke peyiru piak Petronas ngagai rayat Sarawak.
“Taja pia, aku enda seratus peratus puas hati enggau pekara tu, aku deka minta Petronas ngungkupka lebih mayuh ungkup ngagai nengeri Sarawak laban penatai minyak enggau gis chukup mayuh ari nengeri tu.”
Sama bisi ngulu pengerami nya, bini Adenan, Datin Patinggi Dato Jamilah Anu, Presiden SUPP Senator Datuk Professor Dr. Sim Kui Hian, dua iku pemesai dipebasa SUPP, Datuk Patinggi Tan Sri Dr. George Chan Hong Nam sereta Tan Sri Dato Sri Peter Chin Fah Kui, Menteri Muda Penyambung,Datuk Lee Kim Shin ke mega Sapit Presiden SUPP sereta Chairman Komiti Parlimen Miri-Sibuti, Kaban Kunsil Nengeri (ADUN) Lambir, Ripin Lamat, ADUN Telang Usan, Dennis Ngau, raban orang dagang bansa China, pemesai politik ari pampang parti Barisan Nasional (BN) ke bukai sereta bala tuai raban bansa.