Isu tol Jematan Lanang dipejurai enda lama agi

0

Dikarang Judan Bungap//

 

MAI BERITA MANAH: Penatai Adenan disambut mensia mayuh sebedau bejadi Taun Baru China Parti Sa’ati Rayat Sarawak Pampang Sibu ditu, kemari.

SIBU: Kepala Menteri Datuk Patinggi Tan Sri Adenan Satem madahka iya deka nerang ngagai mensia mayuh senentang isu tol Jematan Lanang sebedau tengan taun tu.

Iya madah, kompeni ke ngaga jematan nya udah berandau enggau perintah nengeri lalu sida besedia deka ngurangka agi bayar tol tauka ngemaduka bayar tol nya.

“Pekara tu ukai bepun ari Parti Tindakan Demokratik (DAP). Kompeni nya berandau enggau aku sereta ketuai bukai Barisan Nasional (BN). Tang enti kita deka mayar tol nya belama, kita tau berandau enggau DAP.

“Aku enggai meda orang ngambu dengah orang bukai,” pia ku iya madah maya bejadi Taun Baru China Parti Sa’ati Rayat Sarawak (SUPP) Pampang Sibu ditu, kemari.

Iya madah, rayat tau nganu iya nyema pekara nya puntan.

Dulu agi ari nya, Chairman SUPP Bukit Assek Chieng Buong Toon ba jaku iya bisi ngenataika sekeda peminta ngagai Kepala Menteri.

Sekeda ari peminta tu iya nya bekaul enggau pengawa minta ngemaduka bayar tol, ngemanahka sistem parit enggau entali ai di Sibu enggau pengawa ngaga nama baru Jalai Sepital ngagai nama Jalai Lau King Howe.

Ba tol, ku Chieng, bayar tol nya kelalu mar taja jematan nya mai mayuh penguntung ngagai rayat kenyau ke udah tembu ari taun 2006 suba.

“Ambika banding, baka orang bekebun ti bulih urung RM50 sehari asil ari barang ke dijual sida nengah jematan tu deka mayar tol RM6 pulai mansang.

“Tu balat nating sida kelimpah bisi mega nengah jematan nya tiga kali pulai mansang dalam sehari,” pia ku iya madah.

Ketegal nya, ku Chieng, bayar tol nyadi isu politik berengkah ari pengawa bepilih 2006 enggau 2011.

“Nya alai, sida ke enda berasai lantang ati ketegal pekara tu lalu mantupka pengeringat ngagai SUPP.

“SUPP balat alah nyentuk nyauka semua penuduk DUN enggau Parlimen ba sitak tu diempu penyakal,” ku iya madahka baru.

Bela bisi datai maya tu iya nya bini Adenan, Datin Patinggi Datuk Jamilah Anu, Sapit Kepala Menteri Datuk Patinggi Tan Sri Alfred Jabu, Presiden SUPP Senator Datuk Dr Sim Kui Hian enggau Temengong Vincent Lau.