Raban penyukung PKR di Simunjan mantah atur SPR

0

KAMI MANTAH: Seraban ari sida ke mantah maya nganjung bantah ngagai SPR di Dewan Masyarakat Simunjan kena 25 Feb tu tadi.

KUCHING: Tiga raban pengundi nyengkaum 200 iku sida ari sitak parlimen Batang Sadong bisi ngaga bantah ngagai Opis Komiti Pengawa Bepilih (SPR) pasal pekara magi garis sitak parlimen di Dewan Masyarakat Simunjan kena 25 Feb tu tadi.

Raban pengundi ke mantah nya, raban sida ari Simunjan lalu seraban agi pengundi ari sitak ti diperambu deka dibagi garis sitak, iya nya Gedong.

Raban sida ke mantah nyatebal ari penyukung Parti Keadilan Rakyat (PKR), lalu sida madah nadai kebuah sitak Simunjan nya dibagi ngagai Gedong enggau Simunjan.

“Sitak N25 Simunjan nya enda bangat besai, tambah mega pengundi pan enda mayuh.

“Nya alai, pengawa magi sitak bansa tu nadai meri sebarang penguntung enti diperati ari sukut pemansang. Jalai udah manah memagang,” ku sida iya.

Kelimpah ari nya, ari penyampau pengundi mandangka sitak Simunjan kediatu bisi urung 11,205 pengundi, ti jauh bida ari pupu rata saiz menua ke bisi 13,526 pengundi ke sitak menua.

“Diatu SPR udah merambu N25 Simunjan semina bisi 7,885 iku pengundi. Pekara tu terang mandangka penyampau pengundi nadai bela ba sesebengkah sitak.

“Nya kebuah kami mantah pengawa ke digaga SPR pasal N26 Gedong di P200 Batang Sadong. Gedong semina diperambu 6,430 pengundi ke dalam pemesai 47 peratus pupu rata sitak menua di Sarawak.

“Sitak P200 Batang Sadong diperambu ngembuan pemayuh pengundi urung 20,977, ke baruh ari sais pupu rata sitak parlimen (35,779) lalu ukai dalam menua pesisir enti dibanding enggau sitak Parliamen Ulu Baram tauka Ulu Rejang enggau pemayuh pengundi urung 31,476 sereta 23637 ke kededua sitak nya.”

Raban ke mantah nya mega nyadang semua sitak di N27 Sebuyau deka diambi ungkup Batang Sadong, ngambika ulih ngempung seiti sitak parlimen ke besai, ke bisi urung 29,781 pengundi.

Sida iya mega mantah ubah ba sentang Rangkang (365 pengundi), Putin (180 pengundi), Rangawan (345 pengundi), Terasi (303 pengundi), Senangeh (169 pengundi), Sungai Buloh (218 pengundi), Ensengei (249 pengundi) ari Sadong Jaya ke Simunjan, nitihka atur diperambu SPR.

Seraban ari sida nya ari Simunjan mega melabaka pengundi di pelilih Kedumpai ke dipegai Sitak Pelilih Menua Samarahan deka dibagi ngagai sitak P.202 Sri Aman, enggau P.200 BatangSadong.

Kelimpah ari nya mega, pengundi di Keniong ke bisi dalam 1,411 pengundi, ti diperambu dipasukka dalam garis sitak baru Gedong, balat mantah sida enggai dipindah ari N25 Simunjan ngagai N26 Gedong.

Sida iya madahka diri alit ati beratika kebuah sida iya dipindahka, laban enti nitih sida endang pegai sitak Simunjan.