BERANDAU: Ugak (duduk lima kanan) rambau ngatur randau begulai enggau bala ketuai NGO Dayak di Kapit, kemari.
KAPIT: Kaban Parlimen (MP) Ulu Rajang, Wilson Ugak Kumbong bisi ngatur randau begulai enggau bala ketuai Gerempung Ukai Perintah (NGO) Dayak sereta sekeda raban Dayak bepelajar tinggi ba sebengkah restauran ditu kemari.
Tuju randau tu diatur alai Ugak mendingka sebana rayat ke dibantaika sida sebedau pekara nya dibai ngagai Aum Parlimen ti diadang bepun 9 March tu.
“Aku mendingka sebarang penemu, sebana sereta penanggul ke dikenataika. Laban ke nyadi pengari rayat ba sitak Parlimen tu, aku nadai penanggul mendingka semua pekara ke bisi dikenatai. Aku besemaya deka ngemanjaika sebana rayat ba Aum Parlimen enda lama agi,” ku iya.
“Kitai jauh tinggal ari belakang dalam mayuh bengkah pekara kelebih agi ba sukut pemansang.
“Kitai jauh tinggal ari sukut pelajar, tinggal ari awak pengawa puang. Nya alai, Dayak patut meretika pekara tu.
“Bansa Dayak bansa ke chukup mayuh di nengeri tu iya nya 29 peratus ari 2.4 juta rayat nengeri Sarawak, tang kitai agi jauh tinggal dalam semua sukut ari bansa bukai kelebih agi ba awak mangku pengawa.
Diatu, tetiap bengkah ruang bilik bansa Dayak ngembuan pemadu nadai seiku anak ke graduate.
“Enti raban tu enda diungkupka pengawa, sida deka ngemanjaika pekara tu ngagai perintah. Diatu semua orang ngembuan jalai tauka chara dikena betesauka pekara tu ngambika ngerembai ngagai semua sukut nengah bantu media rama. Pekara tu patu dijaga kemaya hari tu.”
“Nya alai, Menteri Besai (PM), Najib Tun Razak madahka raban nembiak kemaya hari tu patut dikemerat. Sida patut dijaga sereta dilindung.”
“Beri sida pengawa ke patut, nengah chara nya sida tau nulung sereta nyaup perintah dudi ari ila,” ku Ugak.
Entara isu ke bisi dipejuraika dalam srandau nya nyengkaum awak nampung pelajar, Kedai Rakyat 1Malaysia, projek jalai ungkup rayat menua pesisir, JPA, sabsidi betanam betupi, isu bekaul enggau pengereja pengawa menua luar ke dibai tama ngagai nengeri tu, isu pengelikun rayat nengeri tu beduduk ari penyampau pengereja pengawa ari menua luar ke gawa di nengeri tu majak nambah, infrastruktur enggau perengka guna ke bukai.
Sama bisi ngulu sesi dialog nya, Sapit Residen Kapit (Pemansang), Minggu Jampong, Pemesai Opis Pelajar Kapit, Ringgit Gawan, Pemesai Opis Lumba enggau Main Raban Nembiak, Jack Janda, Menijar RHB Solomon Kumbong, Chairman Sarakup Dayak Iban Sarawak (SADIA), Edward Manggah, Pemesai Opis Pengerara Api enggau Penyah Penusah (Bomba) Kapit, Sengiang, Pembantu Pemesai Opis Betanam Betupi Tang Bukok, Pemesai Opis Pelajar (Unit Kokurikulum), Kumbong Garit, Sapit Menijar Public Bank, Jacob Bareng, Sekretari Khas MP Hulu Rajang, Johny Osman, Sapit Pemesai Opis Pengereja Pengawa , Khusairy Pangkas, Pengari Gerempung Graduates Bansa Dayak Sarawak, Malang Biat, Pemesai Opis Pengerai enggau Rampa Menua sereta Pemesai Opis Pelilih Menua Kapit, Favian Maseng sereta mayuh agi ke bukai.