Fatimah: NGO dipinta besaup enggau opis menteri pelajar

0

Dikarang Renyenyan Labang//

SELAMAT HARI ORANG INDU: (Ari kanan) Noriah, Menteri Muda Pengintu Pengelantang Robert Lawson Chuat, Fatimah, sereta (dua ari kiba) Sekretari Politik ngagai Kepala Menteri Sharifah Hasidah Syed Aman Ghazali enggau Menteri Muda Pemansang Ruang Bilik enggau Pelajar Anak Mit Rosey Yunus nyirap kek kelai nyambut Hari Orang Indu Antarabansa ke diintu kena 8 March tu tadi.

Barang sapa ke bisi pengelandik dalam BI tau besaup ngiri penemu ngagai nembiak sekula ti ngelingi kitai

KUCHING: Gerempung Ukai Dikuasa Perintah (NGO) di nengeri tu dipinta sereta diperansang besaup enggau opis menteri pelajar ngangkat pengelandik nembiak sekula dalam Jaku English (BI).

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, bepun ari opis menteri pelajar ti dekaka BI enda tau enda pas dalam Sijil Pelajaran Malaysia 2016.

Iya arap bendar dalam raban NGO nyengkaum NGO orang indu di nengeri endang mayuh pengajar sereta bisi ngajar dalam subjek BI.

“Di nengeri tu kitai bisi mayuh NGO ke dipasuk raban orang indu sereta sida ke udah badu ngajar, tu maya ngatika diri muka kelas tuisyen ungkup nembiak dalam komuniti.

“Pengawa (meri tuisyen) ti baka tu endang amat diperansang opis menteri laban sida lebih intensif enggau raban komuniti sereta pengajar tu mega nitihka sistem. Tu ulih mantu ngangkatka pengelandik nembiak dalam BI lebih agi taun 2016 subjek BI enda tau enda bulih pas.

“NGO ngembuan peneleba ke ulih mantu raban bansa lebih agi sida ke endang nyadi pengajar, sida lebih nemu,” ku iya ti nyaga pekara pelajar di nengeri tu.

Fatimah mansutka penemu iya lebuh dirandau raban pengarang berita seraya madahka dalam taun 2016 subjek BI deka nyadi subjek ti patut pas, kelimpah ari diatu semina Bahasa Melayu enggau Sejarah.

Nambahka nya iya madah, dikena ngangkatka pelajar BI ba raban nembiak di nengeri tu, opis menteri pelajar mega bisi ngatur program bukai baka ngena pengajar ari Bristish Council sereta program ‘Full Bright’ kelimpah ari kualiti pengajar, chara enggau pengelandik ngajar.

“Sukung ari apai indai enggau pengeran nembiak empu deka nemu tauka pandai dalam subjek tu mega amat beguna,” ku iya.

Dulu ari nya Fatimah bejadika Bengkel Pemerkasaan NGO Wanita ti diatur Opis Orang Indu enggau Ruang Bilik Sarawak (JWKS) ba Wisma Wanita, ti berengkah diatur kemari nyentuk seharitu (11 Mac).

Lebuh ditanya bekaul enggau atur program ngintu orang indu di nengeri tu iya madahka bengkel ke diatur JWKS sebengkah ari program iya ke dikena ngenegapka orang indu nengeri tu.

Dalam jaku pengelalu, Direktor JWKS Noriah Ahmad madahka tuju bengkel nya diatur dikena meri penyedar enggau penemu ngagai orang indu kelimpah ari bekunsi peneleba sereta isu bekaul orang indu.

“Seharitu bengkel tu digulu 47 iku ari raban NGO orang indu, nyema program tu mujur, kami deka ngerembaika (program sebaka) ngagai zon ke bukai udah tu.

“Ngarapka program dua hari tu meri pangka ti manah sereta bulih penemu baru baka bakani langkar dikena minta geran enggau kebukai,” ku iya seraya madahka bengkel nya endang udah dipasukka dalam kalender JWKS.

Entara modul ti dipejuraika dalam bengkel iya nya ‘Memotivasika Pasukan Melalui Pengucapan Berkesan, Berkomunikasi dan Mengurus Ahli Pasukan Pelbagai Gelagat, Mempertajam Kemahiran Mendengar dan Bertanya Untuk Menjadi Pemimpin Berkesan enggau Membimbing ahli Pasukan dengan Berkesan sebagai Pemimpin’ ti dipejuraika Fasilitator Telemachus Lo ari SMT Learning Solution.

Seharitu, Fasilitator kedua iya nya Mora Morshidi ari ‘Bodco Management Services Sdn. Bhd.’ bejuraika ‘Women Empowerment With Neuro-Linguistic Programming’(NLP), Work and Home Ecological Balance and Change Management (Pattern)’.