ARAM MASUK PEKIT: Duabelas kategori dalam pekit nyendiaka perais urung RM137,000. Dalam gambar, Azlaily (dua kanan), John Riba (kiba) enggau Ketuai Sapit Direktor Opis (Jabatan Tenaga Kereja tauka JTK) Sarawak, Aminah Mustapa (kanan) bediri ngimbai banner pasal promosyen Hari Pekereja 2015.
KUCHING: Gempuru besai beserimbai enggau Hari Pekereja tikas nasional deka diatur kena 1 Mei 2015 di Palan Borneo Konvensyen Kuching (BCCK) ke alai lebih ari seratus buah kompeni ari menua tu enggau ari semenanjung deka begempuru sehari nya ti berambaika leka jaku ‘Pekerja Sihat, Produktiviti Meingkat’.
Menijer Besai Kanan Bagi Servis Pengatur Opis (Pertubuhan Keselamatan Sosial (PERKESO) Datin Azlaily Abdul Rahman madah, laban tu pemungkal iya digaga di luar semenanjung, sereta pemungkal iya di Sarawak, iya ngelalau sekeda kompeni, opis perintah, gerempung sereta serakup ari menua tu sama ngulu gempuru besai tu sereta sama enggau masuk pekit Hari Pekereja.
“Mayuh agi kompeni, opis perintah, serakup enggau gerempung ari Sarawak diperansang enggau Pekit Gelar Hari Pekerja 2015 ti deka digaga di BCCK kena 1 Mei tu ila.
“Beratika penyampau kompeni ke bepalan di Sarawak enggau pekit baka tu dalam berapa taun tu ke udah enda mayuh, alai kami ngelalau kompeni, opis perintah, serakup enggau gerempung menua tu nganjung raban sida iya ngagai pekit ti deka di gaga beserimbai enggau Hari Pekerja 2015 nya di Kuching.
“Sarawak ulih mandangka penyelai ari sukut mantaika pengelandik, pekit, pengawa pemandang, sereta pegelandik bukai,” ku iya.
Iya nandu baru, ngelama tu, pemayuh kompeni, opis perintah, serakup enggau gerempung ke enggau nyambut Hari pekerja lebih seratus buah kompeni, tang ari pemayuh nya kompeni-kompeni ke enggau ari Sarawak enda mayuh, engka bisi dalam sebuah tauka dua buah aja, ku iya.
“Kami mutuska deka meri 10 poin ngaga kompeni ari menua tu, nyengkaum ari Sabah, ngambika tau nyadika peransang masuk pekit Hari Pekerja.
“Ngarapka mayuh agi kompeni ari Sarawak deka masuk pekit tu laban tu meh pengerami ke pengabis besai dikeramika renggat nasional,” ku iya.
Azlaily madah munyi nya lebuh meri licha pasal Promosyen Pekit Gelar Hari Pekerja 2015 ngaga wakil-wakil kompeni, sereta ijinsi opis perintah di Opis PERKESO ditu, kemari.
Entara kategori gelar Hari pekerja ti bisi dipekitka taun tu sereta perais ti bisi disediaka, iya nya dua bels kategori ti deka diberi ulih Menteri Besai Malaysia ngagai pemenang-pemenang gelar nya.
Kategori gelar deka nyendiaka wang perais dalam RM137,000 nitihka kategori, ‘Tokoh Pekerja Negara (Kumpulan Eksekutif) (Wang RM5,000, trofi enggau setipikit), Tokoh Pekerja Negara (Kumpulan Bukan Eksekutif) (Wang RM5,000, trofi enggau setipikit), Tokoh Pekerja Negara (OKU) (Wang RM5,000, trofi enggau setipikit), Anugerah Majikan 1Malaysia (Syarikat Besar) (Wang RM10,000, trofi enggau setipikit), Anugerah Majikan 1Malaysia (Perusahaan Kecil Sederhana) (Wang RM5,000, trofi enggau setipikit), enggau Anugerah Majikan 1Malaysia (GLC) (Wang RM10,000, trofi enggau setipikit).
Kelimpah ari nya, Anugerah Majikan Berdaya Saing Glokal (Wang RM15,000, trofi enggau setipikit), Anugerah Kepatuhan Industri (Perusahaan Kecil Sederhana) (Wang RM10,000, trofi enggau setipikit), Anugerah Majikan Agroteknologi Unggul (Wang RM10,000, trofi enggau etipikit), Anugerah Kesatuan Cemerlang (sektor Awam) (Wang RM6,000, trofi enggau setipikit), Anugerah Kesatuan Sekerja Harmoni 1Malaysia (Sektor Swsta) (Wang RM6,000, trofi enggau setipikit) enggau Anugerah Perdana Menteri untuk Kecemerlangan Sumber Manusia (Wang RM50,000, trofi enggau setipikit).
Ku Azlaily, pekit tu digaga laban deka ameri kelala sereta beterima kasih ngagai sida pengereja pengawa ke udah bebendar gawa ke pemansang menua.
“Pekit tu digaga ngambika ulih neritka agi kaul sereta pemereti ati ‘tripartisme’ entara tiga sukut, iya nya Perintah, Kompeni endur gawa sereta pengereja pengawa dalam pemansang menua.
Sebedau nya, Direktor PERKESO Sarawak John Riba Marin dalam jaku iya ngelalau kompeni, ijinsi perintah sereta peribit, beratika Hari Pekerja renggat Nasional taun tu digaga di Kuching, komiti benung naka iya deka ngangkatka promosyen sereta publisiti di Sabah enggau Sarawak.
“Berindik enggau pekara tu, ijinsi sereta kompeni, enggau gerempung diperansang sama enggau pekit ti bisi digaga beserimbai enggau Hari pekerja tu. Kerejasama ari ijinsi sereta media ulih mantu kami ngangkatka promosyen tu,” ku John Riba.