PENYIKAP DUDI HARI: Snowdan nyuaka setipikit ngagai seiku graduet UiTM ti pemadu nyulut seraya dikemataka Jamil maya atur pengawa nya malam ensana, di Kuching.
Ari nya, sida patut nyikap diri ngena penemu sereta pengelandik ti dikearapka raban pengaji
Dikarang Chris Bishop //
KUCHING: Raban graduet Universiti Teknologi Mara (UiTM) kampus Sarawak patut ngembuan pakej kualiti ke tinggi, ukai semina dipebasa ketegal kuantiti, ku Kaban Kunsil Nengeri (ADUN) Balai Ringin Snowdan Lawan.
Bejaku rambau ‘Malam Pra Graduan Mac 2015’ ba sebengkah hotel ditu, malam ensanus iya keran meda graduet ari palan pelajar tinggi nya diperebutka raban pengaji.
“Kitai suah ninga sebana sentang pengelandik tauka penau raban graduet ti enda manggai ba tikas ti dikearap.
“Sekeda nya enda ngemantupka pinta raban panel maya interbiu, kurang pengelandik komunikesyen sereta sekeda pengurang bukai.
“Anang ngambi mudah pekara tu, giga jalai kitai belajarka pekara baru, ubah ulah sereta runding lalu rebut peluang ke manah ungkup pemaik diri,” ku iya.
Berindik ari nya, tandu Sowdan, raban graduet UiTM Sarawak patut nemu tiap ubah ke bisi nyadi lalu nyikap diri enggau manah ngambika ulih nangkup pinta raban pengaji.
Ngenang kaul ke sama iya mega ngelalau raban graduet enda nguna pengelandik enggau penemu sida enggau tuju mechah komuniti.
Ku iya, ulah ke bansa nya tau bendar ngeruga pengelikun enggau pemaik menua lalu sida patut dulu berundingka chara ngemansangka diri.
Dulu ari nya, Reaktor UiTM Prof. Dato Dr Jamil Hamali ba jaku pengelalu, ngelalau raban graduet nyikap diri napi dunya pengawa.
“Penguji ke endar ti deka ditempuh kita dalam pengidup ukai maya duduk ba bilik peresa.
“Iya ke pemadu beguna iya nya kita tau bulih batang pengawa lalu nempuh semua tanggungpengawa ke diberi pengaji enggau mujur, nya meh penguji ke endar,” ku iya.
Urung 800 iku pra-graduet bisi datai ba pengerami malam nya ke alai Snowdan bisi mega nyuaka gelar pelajar pemadu nyulut.