PILIH MEH UMS: Ari 16,000 iku raban nembiak ke belajar ba UMS, lebih 10 peratus ari penyampau nya raban siswazah ari 25 bengkah menua.
KUCHING: Universiti Malaysia Sabah (UMS) deka ngambi bagi dalam program Borneo Post International Education Fair (BPIEF) edisyen keenam ke deka diatur di Palan Aum Borneo Kuching (BCCK) belabuh 21 nyentuk 22 March, berengkah pukul 10 pagi ngagai 6 lemai.
Tuju UMS nyereta program dikena ngelakuka palan pelajar tu sereta nyendiaka peluang ungkup raban nembiak ke bisi ati deka nampung pelajar ba palan tu.
Kenyau 20 taun udah ditumbuhka, UMS mengkang ngetanka pemujur enggau penyulut palan pelajar tinggi nya ke alai lebih mayuh bansa pengelandik deka disediaka ungkup raban nembiak ke nampung pelajar ditu.
“Kitai nyendiaka mayuh bengkah proses belajar ke dinamik sereta ngembuan tikas kualiti ke tinggi dalam sukut pansik enggau pengelandik raban pengereja pengawa ke gawa di universiti tu,” ku Prof Datuk Dr Mohd Harun Abdullah, Mandal Chanselor UMS.
Ari 16,000 iku raban nembiak ke belajar ba UMS, lebih 10 peratus ari penyampau nya raban siswazah ari 25 bengkah menua.
Ketebal agi datai ari menua Malaysia kelimpah ari menua Indonesia enggau China.
UMS ngembuan tiga buah kampus iya nya Kampus Indu ke bepalan di Kota Kinabalu, Kampus Labuan sereta Kampus Sandakan.
Naka tu, UMS ngembuan 10 buah fakulti iya nya ‘Fakulti Sains dan Sumber Alam’, ‘Fakulti Kamanusiaan, Seni dan Warisan’, ‘Fakulti Psikologi dan Pendidikan’, ‘Fakulti Kejuruteraan’, ‘Fakulti Komputeran dan Informatik’, ‘Fakulti Pertanian Lestari’, ‘Fakulti Sains Makanan dan Pemakanan’, ‘Fakulti Perniagaan, Ekonomi dan Perakaunan’, ‘Fakulti Kewangan Antarabangsa Labuan’ enggau Fakulti Perubatan.
Sabjek ke disediaka ungkup raban postgraduate tau diambi sepenuh maya tauka kereja sambil belajar dalam dua bengkah chara iya nya sechara kereja kursus tauka ngaduka pansik.
Bantu wang nyengkaum scholarsip enggau bantu belajar ke bukai mega bisi disediaka ngagai raban pelajar ke patut.
“Program kami dipejalaika nengah chara praktikal lalu dilanggur dikena ngenyukupka peneka raban graduate ke begigaka pengawa sereta meri penguntung ngagai kompeni,” ku Harun.
“Raban pemansik kami ngembuan kaul ke manah ba renggat menua tu, menua besai enggau antarabansa ke alai pemujur sereta penyulut muntang dijapai nengah ketetiga renggat tu,” ku tandu iya
Pengawa pemansik ke bisi dipejalaika ba UMS seruran dipuji laban ti diguna menua tu nyengkaum menua luar bekaul enggau isu kemaya hari tu.
Tiga bengkah palan penyulut iya nya ‘Pusat Penyelidikan Marin, Bioteknologi enggau Pusat Pemuliharaan Biologi Tropika’.
Di UMS mega, bisi 16 buah unit pemansik ti mansik mayuh bengkah pekara ari pemansik etnografi enggau bansa jelu nyentuk ngagai pelajar menua pesisir, pengawa dagang, pemansang dagang temuai, remote sensing sereta ‘artificial intelligence’.
Palan Pemansik Marin Borneo ngembuan sebuah muzium sereta akuarium ke mandangka mayuh bansa pansik ke bisi dipejalaika dalam bidang sains marin sereta akuakultur.
Perengka guna ke bisi disediaka di UMS endang chukup moden asil ari penemu bala nembiak universiti ditu, ketebal agi begunan akademik ke bisi dipeda agi baru enggau negmbuan tuju ke manah dikena ngajar, belajar sereta bejalaika pansik nyengkaum balai lecture ke ngembuan teknologi tinggi. Librari ngembuan 500 buah komputer sereta rangkaian komputer serata kampus.
Pelajar mega disediaka perengka pengangkut (bas) nyengkaum lima buah kafetaria.
UMS mega nyendiaka mayuh bengkah aktiviti kokurikulum baka seni atas panggau, main asal, projek komuniti sereta lumba enggau main.
Di dalam kampus, bisi disediaka palan diau ungkup raban nembiak ke belajar ba universiti tu kelebih agi diungkupka ngagai raban nembiak ari menua jauh.
Sebarang penerang ke silik tau dikenataika ngagai ‘Opis Bahagian Perkhidmatan Akademik’ ungkup raban nembiak siswazah nengah email: [email protected], Email Palan Pelajar Pascasiswazah, [email protected] tauka ‘Bahagian Perhubungan Korporat’ nengah lumur +60-88-320000, Fax: +60-88-320223, email: [email protected]/[email protected] tauka peda ba portal UMS www.ums.edu.my.