KUCHING: Raban artis Dayak patut ngemanahka agi pendiau diri ngagai tikas ke lebih profesional enti sida deka nyadi ‘duta’ produk-produk dalam menua enggau entarabansa.
Komposer ke mega seiku orang rinduka pengawa seni Dayak, Isa Lee madah, kitai sama nemu mayuh raban artis Dayak ke bisi begamal dalam industri pemerindang menua tu.
Taja pia, kenu ku Isa, peluang sida nyadi duta produk agi bedau ulih sereta enda muntang baka artis tebilang ari Semenanjung Malaysia.
“Agi mayuh sukut ke patut dikemanahka raban artis Dayak kitai nyema sida deka bediri setipak enggau bala kaling artis ari Semenanjung Malaysia.
“Chunto ke pemadu manah iya nya Dato Shiela Majid, Datuk Siti Nurhaliza entara dua iku artis ke chukup begamal sereta bisi penau ke diri empu alai tau matak orang rinduka sesebengkah produk ke dilakuka seduai.
“Aigi tusah artis kitai Dayak deka nunda dua iku orang tu tang peluang baka nya tetap datai nyema sida beamai-amai dalam industri tu,” ku iya.
Nimbal penemu sentang pemansang industri muzik Dayak diatu, Isa madah mayuh lagu Dayak lebih agi lagu Iban ngembuan kualiti ari sukut tiun, muzik, enggau leka lagu.
Tambah mega ku iya, tusun muzik ke dibai raban artis Dayak diatu tau dikumbai seriris enggau lagu Melayu sereta Inggeris.
“Nya alai, maya kitai ninga pun sesebengkah lagu, kitai enda nemu sekalika nya lagu Iban, Melayu tauka Inggeris.
“Enggau jaku puntang, lagu kitai Iban diatu majak professional,” ku iya madah ngagai Utusan Borneo.
Ditanya pekara ke dikearapka iya ngagai industri muzik Dayak, Isa ngarapka mayuh agi rayat kelebih agi bansa Dayak empu nyukung industri tu.
Tambah mega iya minta raban bansa Dayak ke bisi ngembuan penau anang takut nunjukka pengelandik sida belagu.
Seiti ari chara beratika penau ke bisi dikembuan iya nya ngepunka diri enggau ‘album single’ nyadika pelasar nyingkang maju dalam industri muzik Dayak.