DIPENYADI: Mawan (betupi) sedia mangkung tawak kena ngelai bejadika Kelab Rekreasi Kampung Pla Samarahan di Prison Golf Club Batu 6, Kuching ditu, malam ensanus.
Iya mega meransang sida chakah agi ngatur pekit seraya ngemeratka pemanah kedut kaul
KUCHING: Menteri Pemansang Rama Tan Sri William Mawan nyukung penumbuh kelab rekreasyen ke chakah ngatur pengawa lalu dikena meri basa ngagai pemanah pengawa nya iya deka ngagihka bantu belanja ngambika tau dikena ngatur mayuh agi program jemah ila.
Mawan ke mega Kaban Parlimen (MP) Saratok sereta kaban Kunsil Nengeri (ADUN) Pakan madah, kelab patut ngatur pekit golf ketegal main nya udah nyadi sebengkah ari main ti dikerinduka mayuh orang kemaya haritu.
“Golf tu mih sebengkah main ti dikerinduka aku. Ba tikas umur diatu, golf ngipakka tubuh kitai ti udah beumur. Enti kelab ngatur pekit golf aku endang datai masuk bepekit.
“Enti pekit main bukai aku enda ulih enggau bepekit tang tetap meri sukung lalu enti kelab chakah ngatur pengawa aku deka meri bantu belanja lalu bekungsi sekeda runding sentang chara ngulihka belanja.
“Tang duit ke diberi ukai ungkup pengawa dagang,” ku iya maya bejadika Kelab Rekreasi Kampung Pla Samarahan ke diatur di Prison Golf Club (PGC), Batu 6 ditu, malam ensanus.
Ba pengawa nya mega Mawan nyanggup pinta Kelab Rekreasi Kampung Pla Samarahan ngambi iya nyadi Patron kelab ti keterubah.
Tandu iya, kelab patut enggau naka ulih ngempung komuniti dalam program ke diatur lalu ngelalau kaban dalam kelab nemu chara ngaul mensia sereta ngatur kaul enggau perintah.
“Kaban kelab patut landik ngedut kaul, ukai semina entara sama diri tang enggau mensia mayuh seraya ngemeratka kerejasama ti tegap enggau perintah,” ku iya.
Chairman Kelab Merdan Seran ba jaku pengelalu madah pengawa bejadi kelab nyadi bengkah pengawa ke dianti sereta patut dikerami. Kelab dirijista kena 4 Januari 2014 lalu diatu udah bisi 45 iku kaban.
“Semua tu bepun ari pengeran nyendiaka sebengkah gerempung ti tau bejalaika pengawa ngembing peranak menua pesisir lebih agi raban nembiak ba pekara lumba, main asal nyengkaum ngatur licha sentang pekara dagang, pemansang sekula sereta pengelantang ruang bilik,” ku Merdan.
Kelab ti ngangkatka nama menua (ari sungai) entara kampung Entinggan enggau Kampung Melaban, Kota samarahan. Kitai milih Pla ketegal kandang endur nya bedau diempu tauka dikembuan sesapa, tandu Merdan.
Merdan ngenataika puji ngagai Mawan ketegal ti udah ngagihka belanja RM20,000 lalu nyanggup pinta dichiri nyadi Patron.
Raban komiti dalam kelab iya nya Edward Brandah Madi (Penyanding Penemu) Naria Buau (Sapit Chairman ; Emas Gijak (Sekretari); Joyce Chua Geok Im (sapit Sekretari); Monica Chadom (Tukang Pekara Wang); Cr TR David Jiku Nader (Sapit Tukang Pekara Wang); Churchill Edward Drem (Pemesai Publisiti).
Bela datai ADUN Batang Ai Malcolm Mussen Lamoh enggau Presiden Sarawak Chinese Golf Association, Augustine Chin sereta pemekit Golf PLA 2015 ke bukai.
Lebih 40 iku kaban PGC sereta pemekit nyengkaum MP Mas Gading Anthony Nogeh Gumbek.