Raban orang indu di Sarawak ngayanka penyulut nengah NGO

0

KUCHING: Pengulih ti udah dipandangka raban orang indu ba atur pemansang negeri Sarawak bela diakun nengah kaul sida ngulu gerempung ke ukai dikuasa perintah (NGO).

Bini Kepala Menteri Datin Patinggi Dato Jamilah Anu madah, gerempung orang indu baka Sarakup Indu Dayak Sarawak (SIDS) enggau Gerempung Beraban Orang Indu Sarawak (PWWS) nyengkaum SABATI entara chunto pemadu manah sentang pekara nya.

“Orang indu ke nyadi kaban dalam tiap gerempung udah ngaul diri dalam atur pemansang nengeri nengah buah runding enggau kreativiti ke dibantaika gerempung sida.

“Kelimpah ari nya, sida chukup chakah ngatur mayuh macham program enggau tuju ngangkat sereta ngenegap orang indu,’ ku iya.

Jamilah mansutka jaku tu ba pengawa bejadi sereta nutup Pengerami Hari Orang Indu Antarabansa 2015 ‘di Plaza Merdeka ditu, kemari.

Iya ke mega Presiden Sarawak Badan Amal Tenaga Isteri-Isteri (SABATI) madah pengawa manah orang indu mega diakun dalam Majlis Wanita dan Keluarga Sarawak.

“Majlis Wanita dan Keluarga Sarawak mujur nempa mayuh orang indu ti ngembuan pengelandik ba mayuh bengkah pengawa lalu nya nyaup ngenegap institusyen orang indu di nengeri tu,’ku iya.

Seraris enggau pengerami ti nungkatka rambai jaku ‘Make It Happen’, Jamilah ngarapka orang indu majakka pengawa sida ngambika terus mujur ba pengawa ke dikereja.

Ba pengerami nya Jamilah bisi nyuaka gelar Orang (Indu) Dagang 1Azam (From zero to hero) ngagai 7 iku penerima.

Tujuh iku penerima nya entara raban orang indu ti udah mujur ba pengawa dagang nengah program 1Azam Opis Menteri Pemansang Orang Indu, Ruang Bilik enggau Komuniti.

Bela datai Menteri Pemansang Orang Indu, Ruang Bilik enggau Komuniti Dato Sri Rohani Karim, Menteri ba Opis Menteri Besai Nancy Shukery, Menteri Pengintu Pengelantang Pendiau, Pemansang Orang Indu enggau Ruang Bilik Datuk Fatimah Abdullah sereta orang bukai.