SIBU: Gerempung Orang Bumai Bekebun Sarawak (PPS) udah nyikap diri napi Chukai Barang enggau Servis (GST) ke deka belabuh beberapa hari agi.
Menteri Muda Opis Betanam Betupi enggau Chairman PPS Datuk Slyvester Entrie Muran madah, 28 buah Gerempung Orang Bumai Bekebun Pelilih Menua (PPK) ari baruh PPS udah ngerijista ba GST.
“Semua PPK tu ngembuan penyampau dagang RM69 juta enggau untung RM4.7 juta taun seiti nyin tadi.
“Ari 28 buah PPK, 14 buah ngembuan penyampau dagang RM500,000 ninting taun,” pia ku iya maya aum media sepengudah bejadika Kus GST ke diatur PPS enggau Opis Betanam Betupi Nengeri, kemari.
Dulu agi ari nya, Entri ba jaku iya ngelalau PPK ngambika nerangka GST ngagai raban sida ba menua pesisir.
Ku iya, tu dikena nyeliahka raban ba menua pesisir saru penemu sereta nangi enggau sistem pupu baru nya.
“Kami bisi ninga macham penemu senentang sistem pupu baru tu lalu tebal agi dibai dalam politik.
“Tu ngemuntangka sida ti landik bekaul GST malut runding orang ti enda nemu GST.
“Ambika banding, iya ulih nempa cherita ke enda manah bekaul enggau GST ti mai penguntung ngagai politik iya aja,” ku iya madah.
Bela bisi datai maya tu iya nya Manijer Besai PPS Semawi Ismail.