SIBU: Raban nembiak nentuka menua tu mujur nyingkang ngagai tikas menua mansang dudi hari ila.
Kaban Kunsil Nengeri (ADUN) Lingga, Simoi Peri madah, perintah udah numbuhka mayuh bengkah platfrom ba nengeri tu ke diungkup ngagai raban nembiak.
“Tang taja pan baka nya, raban nembiak patut beambi ulih ari program tauka platform ke udah digaga perintah.
“Pia mega, kita anang enggai nyikap sereta ngubah diri nimbal juluk ati perintah ti deka meda menua tu mansang,” pia ku iya madah.
Iya mantaika jaku tu maya bejadi pengerami nutup Program ‘Kawan Ku Sayang Keluarga Ku Kenang’ ungkup raban nembiak konsituensi Linga di Kem Belia Kemunyang ditu, kilah ensana.
Bekaul enggau program nya, ku Simoi, program tu sebengkah ari platform ke engkeman dikena nyagu lalu meri penemu ngagai raban nembiak.
Nambahka nya ku iya, iya ngarapka raban nembiak ke bisi ngambi bagi ba program tu ulih bekunsi peneleba enggau penemu ke baru enggau bala bakih ke bukai enti udah pulai ke menua diri empu.
“Tuju program tu iya nya deka nempa raban nembiak ti regas, ulih dipechaya, sikal kelimpah ulah manah ke bukai nandu pengawa megai menua tu nyadi menua mansang dudi hari ila,” pia ku iya madahka baru.
Program tiga hari berunggu tu berengkah diatur 20 nyentuk 22 Mac lalu digulu 61 iku raban nembiak ari pegai menua Lingga.