Dikarang James Ling//
SAUP ARI PERINTAH: Nanta nyuaka bantu MRP ngagai seiku ari penerima seraya dikemataka Blikau (kanan).
KAPIT: Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi madah, perintah chakah ngatur pemansang ke ditusun sereta dirurun engkeman nangkup peminta peranak menua pesisir.
“Tengkebang Profail Genturung Pendiau (PGP) sebengkah chara perintah meretika pengidup ti ditapi peranak menua pesisir lebih agi sida ke nguan rumah panjai di entigis ulu sungai,” ku Nanta ba sebengkah atur pengawa Ketuai Begulai enggau Rayat di Rumah Jarop, Nanga Sepadi, Katibas, Song, Hari Enam tu tadi.
Program ke diatur raban Nembiak Parti Pesaka Bumiputera Bersatu (PBB) pampang Katibas begulai enggau opis pelilih mit Song sereta opis pengawa khas (JASA) nya mujur matak kaul entara mensia mayuh ditu.
Ku Nanta, di nengeri tu bisi lebih 22,000 Komiti Pemansang enggau Pengelikun Genturung Pendiau (JKKK) ke di baruh kuasa KKLW.
“Di Sarawak, JKKK ngemeranka tanggungpengawa nyelai ari di semenanjung Malaysia ke alai ‘Ketua Kampung’ bekuasa megai urung seratus ruang bilik. Kitai ditu, Tuai Rumah nguasa enda kurang ari sepuluh ruang bilik,” ku iya.
Nanta ke mega Kaban Parlimen Kapit madah, nengah SPU perintah ngena Profail Kampung ti ngundan 24 lambar ngembuan mayuh pekara ti patut diisi JKKK.
Nengah penerang pasal data genturung pendiau, tampai JKKK, perambu, sistem pengentap palan pendiau (GPS) sereta pelin pemansang ti deka dipejalai kandang lima taun ti deka datai, dia Profail Genturung Pendiau tu deka engkeman agi kena ngemansangka menua pesisir.
“Ungkup Sarawak ke ngena format dua lambar dalam profail nya, perintah begunaka mayuh penerang kena ngatur pengawa ngambika peranak menua pesisir enda tinggal pemansang,” ku Nanta.
Ngenang sekeda penerang dalam media rama ke mantah sereta enda puas ati enggau tikas pemansang di Kapit, Nanta madah, perintah mayuh perambu pemansang ti deka dipejalai di pelilih tu.
“Kitai ti merambu pemansang nitihka pematut, ukai sepeneka ati munyi ti disebut sekeda orang. Kitai ulih numbuhka politeknik ditu ngambika bisi kena napi peminta ari nembiak sekula belajarka bidang teknikal. Sida ke ngembuan pemutus peresa ti nyulut tau nyambung pelajar di universiti menua tu empu tauka menua tasik,” tandu iya seraya nyebut, ukai reti nadai universiti di Song tauka Kapit, perintah enda ngemeratka pemansang akademik peranak menua pesisir.
“Kelimpah ari nya, ku iya, KKLW nengah MARA udah mayuh nyendiaka latih teknikal ngambika bisi dikena nyikap nembiak kitai ngulihka pengelandik ba bidang ti diasai dikedekaka makit pengawa diatu.
Berebak enggau nya mega, Nanta ngelalau mensia mayuh ngambika enda mudah tekuing runding ninga petenah sereta achuk sekeda orang ti semina ngulihka penguntung diri.
“Nengah perintah BN kitai udah nyapai mayuh pemansang lalu tu ngayanka pengulih sereta pengibuh perintah ke rayat. Kitai mega meda chara penyakal megai perintah di Selangor, Pulau Pinang enggau Kelantan. Enti kitai manding Kelantan, nadai mega pemansang sida ngelui ari kitai,” ku iya.
Maya atur pengawa nya, Nanta mega nyuaka bantu projek mit menua pesisir (MRP) ngagai JKKK Ili Katibas iya nya JKKK Rumah Kujau, Sungai Takan; JKKK Rumah Lucas, Nanga Engkabau enggau JKKK Rumah Ikau, Sungai Musah
Bela bisi ngulu atur pengawa nya, Datuk Ambrose Blikau Anak Enturan enggau bini iya Datin Marie Therese Blikau, D.O. Song, Jackline Bte August, Superintendent Opis Tanah enggau Penyukat Kapit, Peggy Runin, ketuai opis perintah, kaunsilor, Pengulu Salang Manggau, Pengulu Lebun Andol, Pengulu Jamit Untam enggau Penghulu Galau Melina sereta 32 iku tuai rumah ari Batang Katibas sereta mensia mayuh.