Dikarang Jacqueline David//
KUCHING: Sarawak Energy Berhad (SEB) udah nerima pemendar ‘Social and Evironment Impact Assessment (SEIA) bekaul enggau Projek Hidro Elekterik (HEP) Baleh ari Opis Pengeraja Asal enggau Rampa Menua (NREB) kena 13 March tu tadi.
Ketuai Pemesai Eksekutif SEB Datuk Torstein Dale Sjotveit madah, pemendar SEIA nya, deka ngaga perambu sekeda atur bukai ti begunaka pemendar lalu ngarapka projek nya ulih dipejalaika taun baru tu ila.
“HEP Baleh deka mantu nyendiaka pemansang ke meruan sereta menuku dalam peminta industri ba karan. Berindik ari pemujur Kuasa Tau Dikena Baru (SCORE) matak pemeranak pukuk di Samalaju Industrial Park.
Iya mega nyendiaka pengawa puang ungkup peranak Sarawak, sereta ngetanka momentum menua tu ke deka nyapai ekonomi pengelantang pendiau ke besai.
Iya mega setipak enggau peneka Sarawak ke majak mansang sereta ulih beretan, alai SEB mantu nyendiaka penyikap ke tetap, ulih dikarap, kuasa baru ke ulih dikena baru nengah projek baka di Baleh,” ku Torstein seraya nambah, SEB ti mega kaban Gerempung Kuasa Hidro Antarabansa (IHA), mega komited deka ngaga projek nya nitihka atur baka ti udah dipejalaika ‘Hydropower Sustainability Assessment Protocol’.
Torstein madah munyi nya lebuh meri licha ngaga urung 20 pemberita ke bisi ngulu ‘Media Workshop on Sarawak Energy’s Business Operations’ di Indu Opis SEB ditu, kemari ti bela besaup enggau Gerempung Pemberita Pelilih Menua Kuching (KDJA) sereta Gerempung Pemberita Commonwealth (CJA).
Torstein meri besai terima kasih ngagai komuniti di Baleh ke sukung sereta kerejasama ari sida dalam kandang SEB nyendiaka ripot SEIA.
“Penembu HEP Baleh deka meri penguntung ngagai peranak menuia dia kelimpah ari ngenyakah pemansang di nengeri Sarawak.
Kami meri terima kasih ngagai komuniti dia ke sukung sida iya lalu deka terus bekerejasama enggau sida,” ku iya.
HEP Baleh deka digaga ngena ‘Concrete Faced Rockfill Dam’ enggau kapasiti ti dipasang enggau pemesai kuasa 1,285MW. Projek nya di jangka tembu ba taun 2024.
HEP Baleh deka digaga mungkur Sungai Baleh ke dalam penyauh 95km ke sama bekunsi ai enggau Sungai Rajang di Pelilih Menua Kapit.