Dikarang Rengenyan Labang//
KUCHING: Komiti Pemansang enggau Pengelikun Genturung Pendiau (JKKK) serata menua nyengkaum Sarawak deka dichirika nyadi penulung pengerijista pemilih.
Menteri Pemansang Menua Pesisir enggau Kandang Menua Datuk Seri Mohd Shafie Apdal madah, chara nya ulih dikena nentuka orang ti dirijister nyadi pengundi endang peranak genturung pendiau/rumah panjai tauka menua Malaysia.
“Kami udah mutuska dalam kabinet, semua JKKK di serata menua ke ulih tauka patut deka dichirika nyadi penulung pengerijista pemilih, ti diasuh ngiga sereta milih pengundi ba renggat baruh.
“Kebuah sida tu (JKKK) dipilih laban semina sida tu ke nemu agi tauka ngelala sapa bagi orang datai tauka peranak menua nya.
“Ba pengawa bepilih Ke-13 suba, sida penyakal madah, bisi urung 40 ribu iku bansa Bangladesh datai (nyadi pengundi) tang nya bula, ke temu kitai sida tu (Bangladesh) datai ngagai menua kitai gawa nyadi bekuli ukai nyadi pengundi,” ku iya.
Shafie mantaika pekara nya lebuh bejaku ba pengawa bejadika ‘Seminar Kepimpinan Akar Umbi Negeri Sarawak 2015’ ti diatur Opis Menteri Menua Pesisir enggau Kandang Menua (KKLW) begulai enggau Opis Menteri Pemansang Menua Pesisir Sarawak ba Dewan Santapan Kunsil Nengeri ditu, kemari.
Pengerami tauka seminar ti digulu 685 ketuai raban bansa, ketuai genturung pendiau KK) enggau Sekretari JKKK udah dipenyadika Kepala Menteri Datuk Patinggi Tan Sri Adenan Satem.
Nambahka nya dalam aum pengarang berita Shafie dipinta bejuraika pasal RM121 juta elawin ungkup JKKK serata Sarawak, iya madahka elawin nya diberi ngagai tuai rumah tauka ketuai genturung pendiau ti mega nyadi chairman enggau Sektretari JKKK.
“Taun 2015 KKLW ungkupka RM121 juta ngagai nengeri Sarawak iya nya elawin ti diberi ngagai tiap iku ketuai geturung pendiau tauka tuai rumah ti mega nyadi chairman JKKK iya nya sepenyampau RM800 enggau setiausaha JKKK sepenyampau RM200, lalu ngagai kaban JKKK nerima elawain RM50 seiku maya baum,” ku iya.
Dalam aum pengarang berita ke sama, Shafie dipinta ngenang ungkup belanja dikena ngemajuka Sarawak lebih agi menua pesisir, iya madahka opis menteri iya endang bisi nyendiaka ungkup belanja dikena ngemansangka bekal ai beresi, bekal elektrik enggau jalai alun menua pesisir.
Ku iya, opis menteri mega bisi nyendiaka bantu tauka ungkup belanja dikena ngaga rumah ungkus murah di nengeri Sarawak ungkup orang ti kurang penatai pemisi.
“Kena ngemansangka jalai alun menua pesisir kami nyendiaka urung RM400 juta, bekal ai beresi urung RM171 juta ti disambung ngena mayuh chara baka ‘Life Saver’ enggau ke bukai kelimpah ari disambung ari loji ai.
“Lalu dikena ngemajuka bekal elektrik di menua pesisir kelimpah ari ngena retikulasi ari grid kami mega nguna mini hidro tauka solar, setipak enggau kandang menua.
“Nambahka nya ba taun 2015 KKLW mega nyendiaka belanja sepenyampau RM50 juta kena ngaga 2,800 buah rumah (nengah Program Bantuan Rumah) ba renggat nengeri Sarawak,” ku iya.