Dikarang Rengenyan Labang//
KUCHING: Parti komponen Barisan Nasional (BN) enggau parti pro-BN enda tau enda kerejasama sereta nitihka pemutus penemu Kepala Menteri Datuk Patinggi Tan Sri Adenan Satem, dikena ngenukuka perintah BN menang ba Pengawa Bepilih Kunsil Nengeri (PRN) ila.
Berindik ari nya Presiden Parti Tenaga Rakyat Sarawak (TERAS), Tan Sri William Mawan Ikom madah, nyema Kepala Menteri ti mega nyadi Chairman BN deka ngemeranka konsep ‘direct candidate’ maya PRN, nya patut dititih ngambi pulaika penegap BN.
“Tu ukai pekara baru. Kepala Menteri orang ke ngaga pemutus.Enti senario baru begunaka konsep tu, nadai salah dikena laban bepelasarka peneleba ti kala dipeda suba nya ulih mujur.
“Pekara ti pemadu beguna sereta dikemeratka iya nya BN. Nya alai semua parti ti taluk ngagai BN tauka pro-BN,patut bekerejasama tauka gawa begulai nitihka atur Kepala Menteri dikena ngenegapka BN.
“Sapa chalun ke dipilih enda patut dibantah kiba kanan. Tang ke patut dikereja kitai iya nya bekerejasama ngering sereta ngenegapka BN, barang sapa chalun dipilih ti dikearap ulih menang patut disukung,” ku iya.
Kaban Parlimen Saratok nya mansutka penemu munyi tu lebuh dipinta meri penerang bekaul enggau ‘candidate’ ti dipelabaka deka dikena Kepala Menteri ba chalun ti ngarika perintah BN maya Pengawa Bepilih Kunsil Nengeri ila.
Lebuh ditanya, sekalika pengari parti TERAS bisi dipilih ila, nya nadai penanggul sereta tau nyadi, ku Mawan.
“Suba kala nyadi. Tu engka nyadi sereta nadai penanggul. Aku orang BN, aku enda kala pansut ari BN semina aku pansut ari parti lama lalu tama parti baru nyadi presiden.
“Sekalika aku nyadi chalun tauka enda, nya dikemerat, tang pekara ti besai agi reti iya nya BN,” ku Kaban Kunsil Nengeri (ADUN) Pakan nya.