KE PENGINGAT: Peranak rumah panjai enggau Teng (tengah), kaban komiti Seksyen Nembiak SUPP Sarikei enggau raban Bomba begambar ba mua Rumah Setia.
SARIKEI: Semampai bejejaga sereta ngembuan penemu ke chukup sentang pengelikun mayuh bida enti sema bisi nyadi penusah angus ngenyit.
Chairman Parti Sa’ati Rakyat Sarawak (SUPP) Pampang Sarikei, Ding Kuong Hiing madahka pekara tu lebuh bejadika program `Membara Malaysia Pilihanku’ ti diatur Opis Pekara Mensia Mayuh (Jasa) begempung enggau Seksyen Nembiak SUPP ba Rumah Setia Unggok di Sungai Minor, Jakar kena Hari Tiga minggu tu tadi.
Raban pengatur program nya ngemeratka pengelikun ari penusah angus ke alai sida udah ngagauka bala pemesai ari Stesyen Pengerara Api enggau Penyah Penusah (Bomba) pelilih mit menua nya ngambika meri licha ti ditangkan enggau mandangka chara ngena perengka ngerara api ke betul.
Ku Ding, penemu ke diulih ari program ke lebih agi bekaul enggau chara nyeliahka penusah angus ulih dikerembai ngagai peranak rumah panjai bukai.
Dikena ngujugka programnya, raban pengatur pengawa lalu nyadung perengka ngerara api ngagai rumah panjai ba kandang menua nya.
Bela bisi datai ngulu program nya, Chairman Seksyen NembiakSUPP Sarikei, Teng Ung Woo, kaban komiti enggau bala tuai rumah ari rumah panjai ke besemak dia.