MUTARKA PENANGGUL: Wong (tiga kanan) sereta bala ke bukai ngabas palan ke deka jalai ngaduka projek jalai.
SIBU: Projek ngaga dua jalai pemintas dikena mutarka penanggul jalai sekut ke beungkus RM106 juta deka dipejalaika nengah Langgur Pemansang Malaysia Lumpar Kesebelas (RMK11).
Menteri Wang Kedua, Dato Sri Wong Soon Koh madah, kededua projek jalai pemintas nya beguna amat dikena ngurangka jalai sekut ari pasar Sibu.
“Dua projek jalai pemintas tu iya nya Jalai Ulu Sungai Merah nuju ke Jalai Kemuyang enggau ari Jalai Aman nuju ke Jalai Lapangan Terbang,” ku iya ditu kemari.
Jalai pemintas ke nyambung Jalai Ulu Sungai Merah ke Jalai Kemuyang kira 12.5 kilometer penyauh beungkus RM71 juta, lalu Jalai Aman nuju ke Jalai Lapangan Terbang kira 4.5 kilometer pemanjai beungkus RM35.
“Enti udah tembu ila, kitai ngarapka kededua jalai tu ulih ngurangka jalai sekit ba mengeri tu,” ku Wong ke mega Menteri Opis Kaunsil Kandang Menua enggau Pemansang Raban Bansa.
Nangkan nya, kira RM12,846,000 agih belanja diungku dikena ngaga sereta ngemanahka 13 projek jalai raya nengeri (JRN) kira 21.23 kilometer pemanjai di Sibu ba taun tu.
Projek tu mungkur jalai ke nyambung Lapangan Terbang Sibu/Salim, Jalai Ling Chu Ming, simpang lampu trafik Salim, Jalai Teku Pasai Siong, Jalai Sungai Assan, Jalai Teluk Assan, Jalai Kemuyang, Jalai Stabau, Jalai Pulau Dudong, Jalai Aup Rantau Panjang, Jalai Sibu Ulu Oya, Jalai Batang Igan enggau Jalai Sungai Maaw.
Wong ke mega Kaban Kunsil Nengeri (ADUN) Bawang Assan madah, kira RM3,880,000 agih belanja deka diungkup dikena ngaga sereta ngemanahka 15 projek jalai kampung taun tu.
Projek tu iya nya Jalai Melanggan, jalai nuju Rumah Juing, Jalai Kampung Bungan Besar, jalai nuju ke SJK Kwong Hua, Jalai Mawah, Jalai Sing, jalai nuju ke Rumah Nuing, jalai nuju ke Gerempung Lori Sibu, jalai nuju ke Gerija Methodist, Sungai Merah, Jalai Cing Nan Chiong, jalai nuju ke Pendam Ulu Sungai Assan enggau jalai nuju ke Sungai Pak.
“Semua projek itu deka digaga taun tu lalu disadang tembu dalam kandang enam ngagai lapan bulan,” ku iya.
Sama bisi datai Sekretari Politik Kepala Menteri Pau Kiew Chuang, injir Opis Kereja Raya (JKR) Sibu, Tiong King Wei, penulung injinir JKR Yong Sin Ho sereta bala ke bukai.