BERIPAI: Rose (tengah) benung nyuaka tong rachun ngagai Tuai Rumah Imau seraya dikemataka bala kaban JKKK rumah panjai nya.
ENGKILILI: Opis Pemansang Raban Bansa (KEMAS) Engkilili bisi ngatur Program Beripai di Rumah Imau, Langkang Ulu ditu, kemari.
Supervisor Pemansang Rumah Panjai, KEMAS Engkilili, Rose Unggom madah, program beripai nya diatur nyadi sebengkah aktiviti ke dikumbai program K-Komuniti ungkup taun tu.
Kenu ku iya, taun tu Rumah Imau entara rumah panjai ke chukup betuah laban dipilih Opis KEMAS Engkilili alai ngatur program nya.
“Kami ngarapka udah tu mayuh agi rumah panjai di Engkilili ulih alai ngatur program ke baka tu,” ku iya bejaku rambau program nya, kemari.
Sa,a bisi datai Ketuai Opis Kaunsil Pelilih Menua Sri Aman (MDSA), Richard Tawan Sedu, Ketuai Nembiam Parti Pesaka Bumiputera Bersatu (PBB) Engkilili, Encik Jawan, Ketuai Nembiak Parti Sa’ati Rayat Sarawak (SUPP) Engkilili, Encik Jack sereta staf KEMAS enggau Opis Pekara Khas (JASA) Sarawak, Engkilili.
Ba pengerami nya, Rose bisi nyuaka perengka dikena beripai baka bakul uras, skop, changkul, penyapu, rachun rumput enggau utai bukai.