MIRI: Semua raban pengajar dilalau ngambika bejejimat sereta sensitif bekaul enggau isu isu pengarap enggau bansa maya sida bejalaika pengawa ngajar.
Menteri Pengintu Pengelantang Pendiau, Orang Indu enggau Pemansang Ruang Bilik Sarawak, Datuk Fatimah Abdullah madah, dua bengkah isu nya patut dikemeratka raban pengajar dikena nyeliahka isu belaya ketegal bansa enggau saru penemu enggau pangan diri.
“Nama aja niat, tuju sida (pengajar) meseti ngembuan sensitiviti lalu pekara pengarap patut lumur satu diperundingka sida, ngambika orang enda saru penemu,” ku Fatimah madah ngaga pemberita pengudah tembu sebengkah pengerami ke diintu ungkup program nya, ditu kemari.
Iya madah munyi nya lebuh nimbal kes ke bisi dibantaika apai indai nembiak bekaul enggau pengajar ke ditemu nguji matak seiku nembiak indu beumur 13 taun masuk pengarap Islam
Kes nya diatu bisi ayan sereta dipesadungka mensia mayuh ba laman rama. Ulah pengajar nya mega balat dikutuk mensia mayuh.
Fatimah madah, pengajar enda patut ngaga pemutus bekaul enggau pekara baka nya kediri aja.
“Enti bisi pekara ke bekait enggau pekara agama, iya patut dibai berunding ngagai Prinsipal sekula nya.
Enti ngenang sentang pengelantang pendiau anak, apai indai endang orang ke pemadu betanggungjawap ngagai anak ke biak ari 18 taun. Tu utai patut diperundingka bala pengajar.
“Enti bisi pekara ke diasai enda ngelantang ati, bai terus ngagai Prinsipal. Enti pekara pengelantang anak, meseti dibai ngagai apai indai laban sida orang ke pemadu nemu pasal pengelantang bala anak diri,” ku iya.
Kelimpah kompelin enggau ripot polis, bela dipesadungka mensia mayuh ba laman rama iya nya gambar nunjukka sepasang baju kurung enggau tudung pala diberi ngagai anak sida.
Fatimah madah, pengawa meri baju kurung nya tau dikumbai perais laban nya baju nasional.
Taja pia, meri gari sembiang (telekung) ngagai nembiak ukai Islam tau meri pelaba ke nyelai tauka ulih ngasuh saru penemu.
“Nya alai, enti orang nya agi biak umur iya nya baruh ari 18 taun, pengibun ke patut iya nya apai indai. Sida maya tu agi tubah bepanggai ngagai apai indai ba sebarang aja pekara ke bekait. Pekara baka tu meri tudung pala sigi ulih dikait enggau pengarap. Kitai (pengajar) patut bejimat. Pekara baka tu patut diperunding enggau apai indai nembiak nya empu,” ku iya.