SARATOK: Gerempung Pengintu Pengelantang Tuai Rumah Pelilih Mit Menua nyerahka tujuh resolusyen ti bekaul enggau isu kemaya hari tu maya baum besai ditu, kemari.
Nitihku Chairman gerempung nya Tuai Rumah Aju Mawat madah, resolusyen keterubah iya nya minta perintah enda setuju enggau ukum ‘hudud’ dipejalaika di nengeri tu, laban enda patut dikemeranka ba menua ti mayuh pupu bansa baka Malaysia.
Resolusyen kedua ku iya, ngarapka pemutus deka ngena leka jaku Dayak dikena nganti ‘lain-lain’ ulih dipejalaika jampat.
Gerempung mega minta perintah ngemaruka rikot bekaul enggau nyiri tuai rumah laban agi mayuh orang ti bisi kriteria nya bedau dichiri, ku iya.
“Ambika chunto Rumah Balong ti bisi 28 pintu diatu agi nganti tuai rumah sida dichiri,” ku iya.
Nambahka nya, bekaul enggau RM121 miliun belanja ari perintah besai ti diungkup ngagai Komiti Pengintu Pengelantang Genturung Pendiau/Rumah Panjai, patut disadung enggau lengkas ngambika ulih bejalaika aktiviti.
Kelimpah ari nya, gerempung minta ejensi ti bekaul ngatur mayuh agi licha di menua pesisir bekaul enggau pemanah Chukai Barang enggau Servis ( GST) ti deka dipejalaika 1 April.
“Gerempung mega nyukung penuh polisi ti dikemeratka Kepala Menteri Datuk Patinggi Tan Sri Adenan Satem ke lebih agi bekaul enggau pengawa ngemansangka menua pesisir,” ku iya.
Kelimpah ari Aju, semua pemegai pengawa bukai dichirika baru mangku pengawa dalam taun 2015/2017.
Sapit Chairman Ambrose Ambu Dampa lalu Insol Untang nyadi Sekretari lalu Jackson Akong Enky enggau Johnny Nagas nyadi Tukang Wang sereta Sapit Tukang Wang.
Kaban komiti iya nya Ali Bin, Dunga Junit, Kuchun Koti, Juliana Bragai Bedui, Andau Japar enggau Dampai Balai.