SIBU: Ketegal penaluk nyukung Parti Sa’ati Rayat Sarawak (SUPP), ex-Pengulu ke megai Sungai Salim (Ulu/Nanga), Sengan, Menyan, Sibu Jaya, Batu 16, Jalai Oya enggau Sungai Nibong nadai disambung servis.
Enyang Menchol madah, menteri ke bekaul nya enda nyambung servis iya laban enda nyukung Parti Rakyat Bersatu (UPP).
Iya ngasaika diri kena pangka laya entara SUPP enggau UPP.
“Ketegal aku nyukung SUPP sereta enda pansut ari parti (SUPP) tama UPP, servis aku dikemadu. Pekara tu enda patut laban UPP ukai parti Barisan Nasional (BN).
“Haribulan kepenudi servis aku naka 28 Februari tu tadi. Aku kala minta disambung servis kena bulan Oktober 2014 lalu Opis Kaunsil minta aku ngenataika surat sukung ari menteri ke bekaul.
“Udah nya, meda gaya menteri nya baka ke enggai ngemendarka peminta nya laban iya nemu aku agi nyukung SUPP, Opis Kaunsil udah nya minta aku minta surat sukung ari sapa-sapa pengari rayat BN di Sibu berindik ari DUN Dudong nadai agi pengari rayat ari BN.
“Nasip Kaban Kunsil Nengeri (ADUN) Nangka Dr Annuar Rapa’ee nyukung peminta lalu ngemendarka servis aku kena bulan November 2014. Udah nya, surat sukung timpuh ngelanjarka servis dianjung ngagai Opis Kepala Menteri ngambika diterima tauka enda.
“Naka diatu, status aku agi kekitang, sekalika aku diketu tauka disambung servis berita nya nadai didinga. Aku bedau nerima surat madahka servis aku diketu.
“Kebuah besai menteri nya enggau nyambung servis aku laban aku ukai kaban UPP lalu empai lama ke udah sida udah mantaika chalun nukar aku ari UPP. Nama chalun nya udah bisi dalam sistem lalu iya endang kaban UPP,” ku iya madah ngagai Utusan Borneo ditu kemari.
Enyang madahka pengasa ati laban UPP nguna kuasa sida milih ketuai raban bansa taja sida bedau nyemetak nyadi kaban BN.
“’Ulah’ UPP tu terang mandangka sida milih barang sapa aja ke nyukung sida enti deka nyadi tuai raban bansa. Nya alai, tuai raban bansa ari SUPP baka ‘ditendang’ lalu pekara ke nyengala sida deka bekuasa megai komuniti.
“Utai tu enda adil lalu meri pangka ngagai ketuai ba renggat baruh, pia mega laya entara SUPP enggau UPP sigi enda badu. Enti nitih, nyema UPP ngasai sida bekuasa ba opis kaunsil kandan menua, sida patut ngungkupka kuota ketuai raban bansa enggau betul.
“SUPP bulih sebagi, UPP bulih sebagi. Nya baru betul. Tu enda, semua deka dipenggi sida (UPP) taja sida bedau diterima nyadi kaban serakup parti BN,” ku iya.
Iya madahka diri ukai kelalu gagit deka mangku penuduk nya (Pengulu) tang ngarapka pekara nya digaga enggau lurus.
Ku iya, sapa-sapa aja ulih nukar iya tang pekara nya patut digaga enggau chara manah.
Iya madah, ambika chunti pengawa milih Temenggung enggau Pemancha Sibu empai lama ke udah nunjukka penuduk nya dipangku orang UPP ari sitak Parlimen Sibu enggau DUN Bawang Assan.
Iya madah, nyema penuduk Temenggung diisi UPP, nyadi penuduk Pemancha patut diisi kaban SUPP tauka orang bukai ke patut.
Udah nya, iya minta raban piak ke bekaul nimbal tanya madahka pemutus sekalika servis iya disambung tauka enda enggau lengkas.
Iya mega madah, bisi 92 buah rumah panjai dipegai iya agi mengkang nyukung iya nyadi pengulu.
“Enti pekara tu enda diputar, UPP majak bekuasa pasal milih tuai raban bansa di Sibu, aku empu nyangka deka bediri ba pengawa bepilih kunsil nengeri (PRN) ke deka datai ngelaban chalun UPP ke bediri ba DUN Dudong,” ku iya.