Dikarang Chris Bishop //
Sida berambunka nyawa maya bejalaika pengawa kelia sampaika idup sida ditentuka ba ujung senapang
PADAWAN: Panglima 1 Divisyen Mejar Jeneral Datuk Stephen Mundaw netapka Pingat Jasa Malaysia (PJM) sigi hak raban soldadu veteran lalu sida patut ngena midul nya enggau temegah ati.
“Raban soldadu veteran udah berambunka nyawa maya bejalaika pengawa kelia lalu idup sida maya nya ditentuka ba ujung senapang.
“Nya alai, kena meh Pingat Jasa Malaysia enggau temegah ati lalu midul nya sigi hak sereta basa ke pemadu besai ari Soldadu Malaysia (ATM) enggau perintah ngagai semua kitai,” ku iya.
Mundaw mansutka jaku tu ba pengerami nyuaka Pingat Jasa Malaysia (PJM) ngagai 19 iku soldadu veretan ari Gerempung Veteran Soldadu Malaysia (PVATM) pampang Mambong di Dewan St Paul Bunuk ditu, kemari.
Pengawa nya dipenyadi Menteri Pengeraja Asal enggau Rampa Menua Dato Sri James Dawos Mamit.
Ngenang kaul ke sama, iya ngarap raban soldadu ke bedau nerima PJM liat ati nganti gintir diri laban sida deka nerima ungkup ke sebaka enda lama agi.
“Kitai mengkang neruska pengawa nyuaka PJM ngagai raban veteran soldadu ke patut diberi, nyangka sekeda nya bisi laun kelebih agi ungkup sida ke diau dimenua pesisir.
“ATM seruran ngingatka jasa ke udah diberi sida rambau ke mengkang meri servis lalu pia mega perintah,” ku Mundaw nandu.
Kelimpah ari nya, iya mega ngelalau raban veteran soldadu ke bedau ngerijista diri ba Opis Pekara veteran Soldadu (JHEV) patut ngerijista diri diatu.
Ku iya, pekara nya beguna amat ngambika JHEV ulih nemu palan endur sida diau lalu disangkung ba sekeda program bantu ke bisi diatur JHEV.
“Aku meratka pengawa mantu raban veteran soldadu nyengkaum balu sida ti begunaka tulung.
“Berindik enggau nya, sida dipinta ngerijista diri ba sebarang kem soldadu ke besemak di nengeri tu,” ku iya.