SRI AMAN: Kaunsil Islam Sarawak (MIS) kemari mujur bejadi Pengerami Ngengkahka Batu Pemun Kompleks Islam Sarawak (KIS) Sri Aman’ ke diungkal Tuai Pemegai Menua (TYT) Tun Pehin Sri Abdul Taib Mahmud.
Pengerami nya diatur ba taba kompleks baru di Jalai Datok ditu besepiak enggau Taman Panorama Benak, nunga Opis Residen Sri Aman, digaga ba pemesai tanah urung 5.7 ekar.
Projek nya ti digaga enggau belanja urung RM50 juta, KIS Sri Aman digaga nyengkaum sekeda bengkah infrastruktur baka opis tujuh ringkat enggau sekeda rumah kedai, deka berengkah digaga ujung taun tu lalu dijangka tembu taun 2017.
Kompleks nya deka nyadi kelaie penyerakup sereta semangat sama ngempu komuniti Islam Sarawak alai konsep nya setipak enggau peneka pemansang ke sama bela entara pengarap enggau pemansang infrastruktur.
Menteri Muda di Opis Kepala Menteri (Pekara Islam) ti mega nyadi Menteri Muda Pemansang Infrastruktur Datuk Daud Abdul Rahman dalam jaku iya ngarapka komuniti ti diau di kandang menua nya bela ngambi penguntung asil ari infrastruktur di KIS Sri Aman.
KIS digaga asil ari buah penemu Taib lalu nunjukka iya seiku ketuai ke meratka , pemansang komuniti Islam di menua tu.
“Penatai Tun Taib kitu, sigi manah endar laban iya sigi dikelala enggau pengawa iya ngangkatka pengarap Islam di Sarawak sereta entara nama besai ke dilis dalam sejarah nengeri tu.
“Nya alai, perengkaguna KIS ti digaga nya, ari penemu Taib empu sereta sukung iya pengudah mungkal pemansang tu ti bepunke sebaka di Kuching ke dipenyadi Agong kena 16 September 2013 suba,” ku iya.
Kelimpah ari nya, Kepala Menteri Datuk Patinggi Tan Sri Adenan Satem dalam teks jaku iya ke dibacha Daud ngarapka KIS Sri Aman deka nyadi palan ke berat, nyadi palan aktiviti pengawa rama ekonomi komuniti di sitak tu.
“Pemisi kompleks baka KIS Sri Aman tu, ukai semina nyadi kelaie baru Bandar Sri Aman, ke tebilang enggau ukir sereta perengka guna ke nyelai, tang mega deka ngubah landskap baru di pasar Sri Aman.
“Kelimpah ari nya, iya mega deka nambah pengerami sereta pemanah tebing sungai Batang Lupar ke tebilang enggau pengawa benak,” ku iya.
Kompleks nya ila deka digaga nyengkaum palan komersil, bazar, ‘mini tuckshop’, endur makai sereta palan paking kerita.
Sama bisi ngulu pengawa nya, Ketuai MIS Datuk Putit Matzin, Mufti Nengeri Sarawak Datu Kipli Yassin enggau Menijar Besai Tabung Baitulmal Sarawak Datu Abg Mohd Shibli Abg Mohd Nailie.