Pemansang mengeri Sri Aman begunaka penegap kaul rayat Islam, ukai Islam

0

SRI AMAN: Penegap kaul entara rayat Islam enggau ukai Islam beguna amat ngambika kandang mengeri Sri Aman terus muntang dikemansang.

Perintah benung ngaduka bemacham perambu dikena nempa mengeri Sri Aman nyadi manah agi sereta tau mandangka menua tu ulih nyapai pemansang ke besai agi kelimpah lantang alai rayat diau nuju tikas rayat ke besai penatai pemisi, ku Tuai Pemegai Menua (TYT) Tun Pehin Sri Abdul Taib Mahmud.

Taib madah Perintah Nengeri ngelama tu udah bejalaika atur ke chukup manah, ngemansangka nengeri sereta menua, kelimpah ari kaul ke tegut di entara rayat bepengarap Islam enggau ke ukai Islam.

“Taja pan, kitai bedau selampur ngereja atur nya baka ngaga sitak mengeri tu (Sri Aman) di puak pasar Sri Aman ke baru nyadi mansang ari pasar lama tang taja pia, baka ke dipeda kitai diatu, pasar lama nya bedau ditegu enggau pemansang baru, kelimpah ari peneka kitai semua,” ku Tun Taib.

Iya bejaku munyi nya lebuh bejaku ba Pengerami Ngengkahka Batu Pemun Kompleks Islam Sarawak Sri Aman (KIS)’ di palan kompleks baru nya di Jalai Datok ditu, semak Taman Panorama Benak (betunga enggau Opis Residen Sri Aman) ditu, kemari.

Kompleks KIS 7 tingkat nya deka digaga dalam taun tu lalu tembu dalam taun 2017, deka digaga dalam pemesai 5.7 ekar, iya nya ari penemu Taib empu mandangka penemu iya ke betatika pemansang rayat Islam menua tu ke nyadi palan ke berat penegap sereta kerejasama kena ngangkatka pemansang sereta sosio-ekonomi komuniti di serata menua Sarawak.

Penumbuh KIS nya ila deka nyadi kelai penyerakup sereta semangat bela diempu komuniti Islam, kelimpah ari nyadi pemerat sereta peransang ngagai komuniti di sitak nya sama-sama enggau ngereja pengawa dagang ba pemisi sekeda blok kedai ke digaga dalam kompleks nya.

“Pemansang ke dipeda kitai diatu (di mengeri Sri Aman), iya nya sebuah hotel baru ti bisi digaga kelimpah ari pemansang bukai, deka nyadi pemansang sebagi ari mengeri Sri Aman ke besai agi.

“Dalam kandang 20 taun tu ke udah, perintah udah nusun mayuh perambu pemansang ngelingi Sri Aman, dataika penatai pemisi rayat di Sri Aman pan udah nambah sebaka enggau sitak menua bukai di Malaysia,” ku iya.

Kelimpah ari nya, iya madahka penuduk mengeri Sri Aman ba tebing sungai, lalu ngelalau mensia mayuh sereta Opis Kandang Menua (PBT) di sitak tu ngaga inisiatif ngemanahka agi Sri Aman.

“Sri Aman tebilang enggau aktiviti Pesta Benak, ke udah mujur narit besun-sun orang nemuai kitu, ukai semina rayat di sitak tu aja tauka ari luar sitak tu tang temuai ari menua luar.

“Nya alai, angkatka mengeri Sri Aman chakah agi lalu seiti agi pemerat, iya nya kerejasama kompeni peribit enggau perintah ulih ngangkatka pemanah nengeri tu,” ku iya.

Opis Majlis Islam nya (NGO) ke teulihka pan sida iya ari komuniti Islam empu, ku Taib, tetap deka nusun kereja sida iya nithka atur sereta perambu perintah ke manah.

Ku iya, Bangunan Baitulmal (KIS) ti digaga besemak enggau mesgit sereta deka nyadi penyambung ke manah agi dientara kedai-kedai ke nyadi pemerat aktiviti di Sri Aman, enggau genturung pendiau besemak enggau Sg Sri Aman.

“Aku diberi kuasa milih palan-palan pengarap enggau atur ke manah ke ulih ngangkatka komuniti Islam ba endur ke ulih alai sida iya bekerejasama enggau orang ukai Islam.

“Di Sri Aman tu, begunan baru tentu deka neritka kaul rayat di Sri Aman ke datai ari mayuh macham pupu bansa, lalu ditambah agi enggau pemansang pasar baru ke digaga ngelingi Bandar ke bisi diatu,” ku iya.

Kelimpah ari nya, Taib madah pengawa tuai-tuai komuniti Islam patut meri penemu ngagai bala nembiak baka ni ku konsep pemansang menua tu.

“Bala nembiak ke diangkatka kitai dalam Islam, ukai semina begunaka kitai ngajar sida iya ari sukut pengarap tang lebih besai ari nya, sama-sama mansang enggau orang bukai,” ku iya.

Sama bisi nguluka atur pengawa nya kemari, Menteri Muda di Opis Kepala Menteri (Pekara Islam) ti mega nyadi Menteri Muda Pemansang Infrastruktur Datuk Daud Abdul Rahman, ketuai Kaunsil Islam Sarawak (MIS) Datu Putit Matzen, enggau Menijar Besai Tabung Baitulmal Sarawak (MIS) Datu Abang Mohd Shibli Abang Mohd Nailie.