NGENUAN: Nogeh nyuaka setipikit ngagai ejen Palan Belajar Deriba Kota Gading seraya dikemata Henry di Lundu kemari.
Kelimpah belajarka penemu teknikal, sida mega patut diajar pekara bekaul enggau kereban pengangkut
Dikarang Chris Bishop //
LUNDU: Latih sentang penau chara nyaga pengelikun rambau bekenaka perengka pengangkut entara penemu ke pamadu beguna ngagai semua penguna jalai alun kelimpah ari latih sentang pekara teknikal.
Kaban Parlimen Mas Gading Anthony Nogeh netapka pekara nya diguna ketegal beratus iku peranak menua tu udah lesi bebadi ketegal penusah di jalai alun.
“Menua kitai Malaysia diatu entara menua ti ngerikod kes bebadi di jalai alun ke pemadu tinggi di dunya. Ninting taun rayat kitai bisi bebadi maya musin pengerami baka ke Hari Raya, Taun Baru China enggau pengerami bukai”
“Rikod tu mandangka guna ngembuan penau chara nyaga pengelikun diri enggau orang bukai rambau bekenaka perengka pengangkut,”ku iya.
Nogeh mansutka jaku tu ba pengerami bejadi Roadshow Palan Belajar Deriba Kota Gading Kota Gading (IMKG) ke diatur di Pasar Lundu, kemari.
Ba pengerami nya, iya ngansak raban pematih IMKG bela meratka pengawa ngiri penemu pengelikun di jalai alun kelimpah ti ngajar sentang pekara teknikal baka pasal brek, lampu signal enggau ke bukai.
Bejaku ngenang sentang program ke diadu sehari nya, Nogeh ngelalau peranak Lundu enggau sida ke besemak beambi ulih ari program ke diadu kelebih agi ngerijista diri ngambi lisin entukar, motosikal enggau lori ke disedia IMKG.
Dulu agi ari nya, Ketuai Direktor IMKG Henry Harry Jinep madah program diatur ungkup peranak Lundu, Biawak, Sematan enggau Sampadi ke alai sida bisi meri diskaun 15 peratus ungkup orang ke ngerijista sebedau jam 3 lemai (kemari).
“Aku meransang kitai ditu ngerijista ngambi lisin sebedau perintah berengkah ngena sistem GST kenaka 1 April tu.
“Udah 1 April, bayar ngambi lisin deriba deka nambah,”ku iya seraya ke madah sida semina dipinta mayar RM50 maya ngerijista.
Dulu agi ari tu IMKG udah numbuhka palan servis di MJC Batu Kawa enggau di Bau lalu ba Lundu kompeni semina nyiri ejen aja.
Bela datai Controller Opis Sungai Sarawak William Jinep, Pemesai Pelilih Lundu Hamsein Atar enggau sida ke bukai.