KAPIT: Sekretari politik Kepala Menteri Jefferson Jamit madah, penegap ti dikembuan Parti Pesaka Bumiputera Bersatu (PBB) ngelama tu ketegal kaban parti nya ngembuan ulah ti manah sereta angkun ke ketuai pengiring nyentuk ke redak ba renggat baruh.
“Kaban parti dalam PBB semua angkun ke ketuai ti ngiring parti. Sida mega pechaya, pengiring parti nya ngemeratka rayat sereta penyukung lalu enda melakangka pengelantang diungkup ke sida,” ku Jamit maya bejadika program ‘Mambantu Rakyat Membara 2015 Peringkat Parliamen P 215 Kapit’ ke diatur opis JASA enggau KEMAS di palan servis Kapit, ditu.
Maya program ke diatur ba Rh Meliyu Pilang di Sungai Sesibau ditu, Jamit sempat berandau enggau rayat sereta lima belas tuai rumah ke mungkur lapan belas rumah panjai nebing Sg Kapit.
Bela bisi ngulu atur pengawa nya, sekretari politik Kepala Menteri, Wilson Nyabong Ijang; Penghulu Enggin Nyipa; pemesai JASA, Mohd Matan Yok; pemesai KEMAS, Ambrose Abong Bugek; kaunsilor George Tang; chairman SADIA Kapit, Edward Manggah sereta mensia mayuh.
“Penegap PBB ke nyadi tulang belakang perintah Barisan Nasional (BN) di Sarawak bepun ari tanggungpengawa ke menuku ngiring perintah sereta ngemeratka rayat di menua tu. Kelimpah ari pemanah kaul begulai enggau parti bukai dalam komponen BN, PBB mega ngembuan kaul ke tegap enggau perintah besai nengah iring Kepala Menteri kitai, Sri Adenan Satem,” ku iya.
Program ‘Membantu Rakyat Membara 2015 Peringkat Parliamen P 215’ ke diatur nya, sebengkah ari chara ketuai ngedut kaul enggau rayat di sitak nya.
“Anang enda ingat ngerijista diri nyadi pengundi enti udah manggai umur 21 taun,” ku iya seraya ngelalau mensia mayuh ngemeratka pengerai diri.
Ba jaku pengelalu iya, TR Meliyu Pilang madah, duit bantu RM6,000 ke diberi Menteri Pemansang Tanah, Tan Sri Dr James Jemut Masing dikena ngaga palan ‘internet’ bisi endur bala nembiak begigaka pengawa ‘on-line’
“Bisi lapan buah rumah panjai ti bulih penguntung ari palan nya. Nembiak ari rumah panjai nya tau kitu sereta ngiga pengawa seraya ngerijista diri nengah penyikap ke dikembuan dia.
Bela bisi bejaku maya nya, Wilson Nyabong Ijang, iya mega meransang semua kaban parti PBB enggau mensa mayuh nyukung pengari perintah BN maya pengawa bepilih nengeri (PRN) ti deka datai tu ila.