Penanam pisang nengeri tu tau lantang agi enseput

0

Dikarang Chris Bishop //

NGEMANSANG INDUSTRI PISANG: (ari kanan) Lai enggau Brown beratika sekeda produk ke digaga ari pisang ke bisi dipandang rambau pengawa nya kemari.

KUCHING: Opis Betanam Betupi Sarawak (JPS) mujur nyain sempekat pemereti ati (MoU) enggau Malesiana Tropicals Sdn Bhd (MTSB) ngambika mekal perengka  dikena nyeliah pisang ari keruga penyakit ti tau ngerugika penanam pisang di serata nengeri.

Direktor JPS Datu Lai Kui Fong madah, sempekat nya deka ngangkat industri nanam pisang ditu ke alai bengkah chara ke dikumbai ‘Biotechnology of Meritism Culture of Banana’ dikena.

Ku Lai, chara nya nyeliah pisang ari keruga penyakit enggau pengerusak bukai.

“Keruga penyakit enggau pengerusak bukai entara kebuah industri nanam pisang napi penanggul di serata dunya.

“Pisang suah dirampit penyakit bepun ari bakteria ke dikumbai sakit ‘Moko’ enggau ‘Blood’ kelimpah ari keruga penyakit kulat ke dikumbai ‘Panama’ enggau ‘Sigatoka’. Pengerusak bukai mega suah ngerusak pun pisang.

“Bengkah chara ke dikumbai ‘Biotechnology of Meritism Culture of Banana’ ulih nyeliah pisang dirampit semua penyakit sereta pengerusak lalu ketegal nya opis kitai deka bekenaka chara tu,” ku iya.

Lai mansutka jaku nya ba pengerami nyain sempekat entara kededua ejensi di Palan Pemansik Betanam Betupi Semenggok, Jalai Puncak Borneo ditu, kemari.

Ngenang kaul ke sama, Lai madah nengah sempekat nya raban orang ke bekaul enggau pengawa nanam pisang di nengeri tu ulih ngena chara nya lalu nambah asil pisang sida.

“Bengkah chara tu mega ulih ngasilka pisang ti ngembuan kualiti tinggi sereta mudah ditanam.

“Sigi nyadi juluk Opis Betanam Betupi ti deka nentuka industri tu majak ngerembai sereta mantu raban orang ke bekaul,”ku iya.

Bela datai CEO Malesiana Tropicals Graeme Iain Brown enggau Direktor Pemansik Dr Timothy Hatch.