Pengajar dalam kes mejal Sabrina masuk Islam udah dipindah endur gawa: Fatimah

0

Dikarang Jacqueline R. David //

KUCHING: Dua iku pengajar, Nik Seri Ayu Nik Ibrahim enggau Suti Kamila Md Zain ke ngajar di Sekolah Menengah Kerajaan (SMK) Lutong ke betapi enggau penyalah meri Baju Kurung enggau ‘Telekung’ ngagai seiku nembiak sekula nya, Sabrina Ngumbang ketegal nembiak nya ke madahka diri deka masuk Islam, diatu udah dipindahka ari sekula nya.

Menteri Pengintu Pengelantang Pendiau, Orang Indu enggau Pemansang Ruang Bilik ke ngembuan tanggungpengawa dalam pekara pelajar menua tu, Datuk Fatimah Abdullah madah, kededua pengajar nya diatu udah diasuh pindah ngagai Opis Pelajar Pelilih Mit Menua (PPD) seraya nganti tasat kes nya tembu.

“Nitihka SOP (Standard Operating Procedure) Opis Menteri Pelajar (KPM), kes baka pengajar ngachau nembiak tauka nyamah, (rape) tauka kes bansa tu, SOP enda tau enda digaga dalam kandang tiga hari udah bekau kes nya nyadi, alai iya mega deka ditasat.

“Udah ripot digaga, baru ulih ngambi atur ke patut ba pengajar nya. Enti nitihka SOP, kami deka mindahka dulu pengajar nya ari endur kes nya nyadi, ngambika semua orang ke bisi besangkut paut enggau kes nya, ulih diau sekejap.

“Dalam kes baka tu, kami pan ngena SOP ke sebaka, laban kami enggai pendiau dalam sekula, komuniti pengereja pengawa sekula sereta nembiak sekula dia agi ringat, nya kebuah pengajar tauka sapa-sapa dalam sekula  ke ngaga penyalah, dipindahka dulu ari sekula nya,” ku Fatimah.

Iya madah munyi nya lebuh dirandau dalam aum media pengudah nyadi chairperson aum media bekaul enggau numbuhka Palan Belajar Komuniti (CLC) ungkup nembiak rayat Indonesia ke gawa di kebun-kebun menua tu, di opis menteri nya di Dewan Kunsil Nengeri ditu, kemari.

Iya nandu baru, pengudah tasat nya ila ti digaga dalam kandang tujuh hari, enti kededua pengajar nya ditemu salah, sida iya tau diukum Opis Menteri Pelajar (MOE) nengah genteran tusu ukum ‘Kelakuan-kelakuan Pegawai Awam mengikut Tatatertib Pindaan 2002’, ku iya.

Fatimah madah, bisi betemu enggau kededua pengajar, Sabrina, apai indai Sabrina, raban gerija, enggau aki Sabrina empu (ke ngibun iya ngelama tu) kena hari Lima tu tadi.

“Aku bisi ngangauka semua sida ke bisi besangkut paut enggau kes tu, laban enggai semina ninga cherita ari sepiak aja, awakka sama-sama mendingka ari semua sida ke bisi dia nyengkaum mending ari Sabrina empu. Enti udah sama-sama mending utai ke nyadi nya, ngambika semua sida ke baum enggau aku nya, ninggalka bilik baum nya enggau ati ke lantang sereta nemu utai ke nyadi enggau silik agi,” ku iya.

Iya madah, dalam pekara nya bansa sereta pengarap, kededua pemerat tu enda tau enda dijurai enggau silik, laban kededua pemerat tu tau ngachau pengelikun menua.

“Nya alai, barang utai ke dibantai kitai ba internet, berunding dulu, bejimat laban impak iya udah nya ila, pedis deka diputar laban nya besangkut paut enggau bansa sereta pengarap.

“Pekara pelajar enda tau dikaul nengah politik, kitai patut beratika pelajar tu enggau logik, profesyenal….Nya alai, anang ngaga iya tu nyadi pekara politik tauka semina ngulihka publisiti politik,” ku iya.

Fatimah nandu baru, pekara bekait enggau pengarap Islam, iya nya ‘masuk Islam’ enti besangkut paut enggau nembiak umur baruh 18 taun (dalam kes Sabrina, iya baru berumur 13 taun dalam Pom Satu), enti nembiak nya madahka diri deka masuk Islam, anang enda ingat laban nembiak nya agi bisi apai indai.

“Apai indai Sabrina, orang ke sah nyaga iya taja pan iya diau enggau aki iya. Nya alai, enti nembiak bansa tu madahka diri deka masuk Islam, anang enda ingat iya agi bisi apai indai.

“Enti amat bisi minat dalam Islam dalam umur nya, belajar dulu pasal Islam datai nembiak manggai umur 18 taun, baru tau mutuska diri empu. Tang seagi-agi umur baruh ari nya, anang guai dulu meh, anti aja udah manggai 18 taun,” ku iya.

Nitihka cherita Sabrina, hari Empat tu tadi, iya disempulang seiku pangan iya bisi betemu enggau pengajar, Nik Seri Ayu ke lalu minta penemu ari seiku ‘ustazah’, pengajar Suti ke nangkan nya, lalu meri Sabrina ‘Baju Kurung’ enggau ‘Telekung’ (kain kena orang indu Islam sembiang).

“Nya penyalah dua iku pengajar nya laban nadai minta pemendar apai indai Sabrina, taja pan Sabrina bedau masuk Islam (agi mengkang bepengarap Keristin). Nya alai, sebarang cherita bekaul enggau pekara tu, ketuka dulu meh, enda ibuh digaga isu politik, tauka madahka penyalah ‘pengajar ari semenanjung’, enggaika penusah nya enda teputar ila,” ku iya.