KUCHING: Seraban 50 iku pemansik ari mayuh bengkah penau Unit Pemansang Pekara Pansik Opis Kampung enggau Inovasyen ngejang ke Gunung Pueh, Lundu, kemari.
Ketuai ekspedisyen Dr Ahmad Ampeng madah pengawa sida begunaka timpuh 10 hari lalu deka ngerikod bemacham bengkah utai idup enggau utai tumbuh ti bisi di bukit nya.
“Ekspedisyen tu nampung ekspedisyen kediri aku kenyau ari taun 2012 lalu tu meh ungkup keterubah iya ekspedisyen Gunung Pueh diadu besai iya nya disereta mayuh raban pemansik.
“Kitai netapka juluk ngerikut semua utai tumbuh enggau utai idup ditu ngambika ulih nyukung ngangkatka Gunung Pueh nyadi ‘National Park’,”ku iya bejaku ngagai pemberita pengudah ngulu pengawa ekspedisyen nya diperengkah di Opis pelilih mit Lundu ditu.
Pengawa ngelanchar Ekspedisyen Gunung Pueh dikemujur Kaban Kunsil Nengeri Opar Ranum Mina.
Ngenang sentang pengawa nya Ranum pechaya Gunung Pueh bisi potensyel diangkat nyadi ‘national park’ enggau palan pematak temuai jemah.
“Aku dipadah diak ba tuchung bukit nya chukup chelap kelimpah ti ngembuan mayuh utai idup enggau utai tumbuh sereta mega lubang gua ti tau nyadi produk pematak temuai.
“Kitai deka ngangkatka mayuh agi palan pematak temuai di Lundu enggau Sematan kelimpah ari tebing tasik lalu aku pechaya Gunung Pueh bisi potensyel.
“Tembu ekspedisyen tu aku ngarap Gunung Pueh ulih diangkat nyadi ‘national park’ sereta palan endur ngemata jelu siga,’ku iya.
Pemaik rampa menua tauka pesaka tu patut diintu manah ngambika dipeda, diasai nembiak rebak baru, tandu iya.