KUCHING: Seiku penyukung tegap Parti Tenaga Rakyat Sarawak Teras (TERAS), Augustine Chin minta kaban parti tu numbuhka mayuh agi Komiti China ba sitak Kunsil Nengeri (DUN) di serata nengeri tu.
Tuju atur baka tu, ku Chin dikena mantu nambahka penyampau kaban komuniti China nyereta Barisan Nasional (BN) nengah TERAS.
Kenu ku Chin, taja mayuh parti ke bepelasarka bansa tauka nyengala diarika bansa China dalam BN, tang agi mayuh rayat China ngiga parti baka TERAS nyengkaum pemain golf baka iya.
Chin seiku orang ke mungkal numbuhka Gerempung Golf Sarawak China di nengeri tu.
Enggau jaku puntang, Chin madahka diri taluk nyukung Presiden TERAS Tan Sri William Mawan, laban ke kenu ku Chin : “Presiden Parti (Mawan) seiku orang ke siru sereta jampat teleba nyadi kaban, laban ke nyadi ketuai iya nunjukka ngagai kitai iya kasihka rayat.”
“Aku beratika pekara tu (chara ngulihka sukung ba mengeri ) nyadi chara dikena ngelakuka publisiti TERAS nengah pengawa nulung orang ke enda bidik lansik tauka tusah (di kandang mengeri),” ku Chin ba sebengkah pengerami ke diatur di Jalai Pisang, ditu.
“Baka semua ketuai parti ke bukai, kami deka gawa begulai enggau semua parti politik serakup BN negeri. Kami deka begulai enggau semua orang ngemansangka Sarawak ungkup rayat Sarawak,” ku iya.
Naka tu, TERAS bisi 23 bagi menua ke udah ngerijista diri ba Opis Pengirijist Gerempung (ROS) lalu tebal agi sida tu ari menua pesisir.
Kena malam hari Lima tu tadi, Chin ngatur pengerami ungkup bala kaban baru TERAS ari mengeri Kuching begulai enggau Mawan ke mega Menteri Pemansang rama ba rumah iya di Jalai Pisang ditu.
Semak 300 iku temuai bisi datai ba pengerami nya.