Projek jalai Pan Borneo dikearap ulih ngubah standard jalai kampung

0

KUCHING: Projek pemansang jalai besai Pan Borneo deka muka peluang besai ngagai kompeni Sarawak sereta ngangkatka pemanah perengka penyambung ungkup rayat di menua pesisir.

Menteri Pemansang Tanah Tan Sri Datuk Amar James Jemut Masing madahka, berindik ari pekara nya kompeni sereta rayat menua pesisir patut nguna peluang nya enggau manah.

Diatu Sarawak berengkah ari Sematan nyentukka Lawas endang udah disambung jalai alun tang nya tau dikumbai standard jalai kampung,” ku iya.

“Nya alai projek pemansang Pan Borneo patut nyadi jalai besai ti bekelas dunya. Lalu kitai meseti ngambi peluang tu sereta nyadika tanah NCR lebih produktif.

“Pemansang Pan Borneo deka ngemuntangka agi ngelawa menua pesisir. Peranak menua pesisir enda tau enda enggau pengawa ngemansangka tanah ti kelalu mayuh nya.

“Aku ti mega nyadi Presiden PRS iya parti ti bepelasarka menua pesisir, utai ti dipinta aku iya nya minta piak ti bekaul meri peluang ti nadai bechiping ngagai peranak menua pesisir ngujika pengelandik nitihka guna industri,” ku iya madah ngagai Utusan Borneo apin lama.

Bejaku baru iya ngelalau peranak menua pesisir ngambika enda ngelangkung diri lalu enda ulih nunjukka pengelandik diri enti deka mujur.

Ku iya, ‘minta’ ngagai orang bukai dikena ngidupka diri ukai ulah peranak menua pesisir, nya alai patut ngambi peluang pemansang ti bisi disediaka.

“Aku udah meda orang ti ngembuan tanah ti mit tang teulihka asil ti manah. Nama kebuah bansa Dayak ti mayuh tanah enda ulih ngereja iya?.

“Aku meransang bansa kitai ngemansangka tanah enggau bebendar sereta gawa enggau sikar. Belajar meh ari orang bukai,” ku iya.

Nitihku iya, dalam timpuh 10 taun ke deka datai, RM43 billion deka dibelanjaka dikena ngemansangka infrastruktur ti dipejalaika dua ejensi iya nya Sarawak Energy Berhad  (SEB) (RM28 billion) enggau RM15 billion dikena ngaga Pan Borneo Sarawak.

Ku iya, SEB deka ngenegapka industri kuasa karan ti deka ngemansangka industri nya enggau jampat sereta nyendiaka lebih amyuh peluang gawa ngagai orang ti sanggup gawa.

“Dua pemansang tu muka peluang besai ngagai kompeni kitai di Sarawak enggau peluang gawa ngagai sida ti sanggup gawa senipak enggau pengelandik sida,” ku iya.