KUCHING: Unit Penyeliah Penusah Angus di Sepital Bintulu deka dikemanah ngambika setikas enggau unit ke sama di Sepital Besai Sarawak (SGH) berengkah taun 2015 tu.
Menteri Muda Pengerai Mensia Mayuh Datuk Jerip Susil madah pemutus nya diambi ketegal Bintulu ngembuan mayuh gudang ti bejalaika industri.
“Pelilih Bintulu udah nyadi sebengkah palan industri ke besai ke alai penusah disadang deka nyadi suah agi.
“Berindik ari nya kitai netap, deka ngangkatmanah Unit Penyeliah Penusah Angus di Sepital Bintulu ngambika setikas enggau servis ke disedia ba unit ke sama di SGH.
“Belanja penyampau RM5 ngagai RM10 juta diguna ba pengawa nambah perengka ke dikena ba pengawa ngubat orang angus (luluh) sereta mega nambah penyampau orang gawa ba unit nya,”ku iya.
Iya mansutka jaku tu ba sebengkah aum pengarang berita pengudah bejadika ‘Program Kesedaran Kelecuran – Be Burn Aware’ ke diatur Unit Buntas Plastik & Rekonstruktif, SGH pengelama dua hari berunggu berengkah 4 ngagai 5 April di Boulevard ditu, kemari.
Jerip nambah unit nya ila deka disikap ngena 10 buah katil lalu diatu pan mengkang bejalaika pengawa ngubat kes angus (luluh) ke mit ke alai seiku lutur pakar ba pengawa nya endanag bisi disediaka.
Iya ke mega Kaban Kunsil Nengeri (Bengoh) madah enggau nya Sarawak deka bisi dua buah sepital ke ngembuan unit pakar sentang kes betu.
“Taja pia ukai reti sepital bukai di nengeri tu enda ulih merubat kes betu. Sepital bukai mega meri servis tauka merubat kes betu ba tikas ti keterubah tang udah nya dianjung ngagai Sepital Bintulu tauka SGH ngambika tau diperubat enggau manah agi.
Ngenang sentang program ke diatur, Jerip ngarap program ke sama ulih dipejalai di pelilih bukai.
Ku iya, pemereti guna ngintu pengelikun ba palan gawa chukup berat lalu raban orang gawa enggau pengaji dipinta ngemeratka pekara nya.
Ba program nya kemari, Unit Buntas Plastik & Rekonstruktif enggau Opis Bomba bisi mandangka sekeda perengka ke dikena sida enggau penerang bukai.
Bela datai Chariman Pengatur Program ke mega pakar Buntas Plastik & Rekonstruktif Nengeri Dr John Ranjit, Komisioner Bomba Kanan Tn Kurung Suwen enggau orang bukai.