MERUAN TEGAP BEPENGERAI: Adenan (tengah) mandangka penegap iya seraya diumba bala menteri bukai (ari kiba ke kanan) Nancy, Fadillah, Khairy, Lee enggau Fatimah.
Kelimpah ari nya, iya mega ngelalau semua ngambika ngatur bansa pemakai ti menuku ngasuh bepengerai
Dikarang Jacqueline David //
KUCHING: Kepala Menteri Datuk Patinggi Tan Sri Adenan Satem meransang rayat Sarawak ngemeratka pengerai ngambika ngembuan pengelantang pendiau ke panjai.
Iya madah munyi nya lebuh bejaku bejadika Fit Malaysia renggat menua ba siti atur pengawa di Padang Merdeka ditu, kemari, ke sama digulu Menteri Nembiak, Lumba enggau Main Khairy Jamaluddin.
Ku Adenan, pekara bekait enggau pengerai tu siti pekaraa ke berat dalm tiap sukut pendiau mensia mayuh kelimpah ari ngatur pemakai enggau menuku.
“Diatu aku udah berumur 71 taun tang peda gamal baka orang ke berumur 20 taun biak agi, sereta agi gap endar! Nya kebuah kitai dipeda agi tegap sereta bepengerai,” ku iya.
Lebuh nusui peneleba iya empu, dua taun ke udah, Adenan madahka lebuh nya iya balat endar sakit lalu dipasukka ngagai Institut Jantung Negara (IJN) enggau Palan Pakar Berubat Normah (NSMC).
“Maya nya, kumbai aku, udah maya iya meh nya.
Nyau betesau meh kami sebilik, udah ngangau sida iya ke sepital, tang ketegal Tuhan aku agi ditu.
“Nya alai, kitai enda tau enda ngembuan pendiau ke bepengerai nyengkaum ngemeratka bansa pemakai.
Sehari tu, aku tegap, gerai baka Khairy (Menteri Nembiak, Lumba enggau Main, Khairy Jamaluddin Abu Bakar) lalu nyangka sigat agi ari iya,” ku iya seraya betundi enggau Khairy.
Nangkan nya, ba jaku Khairy, iya madah Fit Malaysia digaga, laban nya siti ari pengawa perintah nyapai peneka menua tu ngaga Malaysia nyadi menua lumba enggau main.
“Kitai lalu bedau nyapai peneka nya, laban rayat Malaysia agi mayuh ke enda bepengerai, nyengkaum sida ke kelalu gemuk (obese) tauka bisi kemi manis, darah tinggi sereta penyakit berat bukai.
“Kitai enda tau enda beratika orang kitai gerai ngambika sida iya ulih nyadi orang ke produktif nyengkaum ulih ngiga rayat kitai empu ke landik dalam lumba enggau main,” ku iya.
Khairy madahka Menteri Besai Datuk Seri Najib Tun Razak bisi udah madahka deka diatur Hari Lumba enggau Main Nasional tiap hari Enam minggu kedua dalam bulan Oktober, ti deka disambung ninting taun.
“Kitai deka ngaga tauka ngiga bintang lumba enggau main, nyadi orang ke bepengerai, lalu nyadi menua ke bepengerai sereta produktif,” ku iya.
Entara pemesai ke sama bisi ngulu atur pengawa nya kemari, Menteri Kereja Raya Datuk Seri Fadillah Yusof, Menteri di Opis Menteri Besai Nancy Shukri, Menteri Muda Lumba Datuk Lee Kim Shin, Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah enggau Sekretari Perintah Nengeri Tan Sri Datuk Amar Morshidi Abdul Ghani.