Dikarang Rengenyan Labang//
KEPENGINGAT: Mary begambar bebala mayuh enggau kaban Biro Indu JKKK Siol Kandis ti nyereta kelas nya.
Kaban Biro Indu JKKK Siol Kandis ukai semina nyungkak penatai pemisi tang ngedut kaul nengah program nya
KUCHING: Biro Indu Komiti Pemansang enggau Pengelikun Genturung Pendiau (JKKK) Siol Kandis apin lama ke udah, mujur ngatur kelas belajar ngaga kereban ngemajik diri ari leka marik.
Chairperson biro nya, Mary Atang lebuh dirandau pengarang berita madah, kelas nya berangkah diatur ari bulan Januari ngagai tengah bulan April tu tadi, ti dipasuk kaban biro nya.
Kelas nya udah diatur tiap ujung minggu di balai raya SDNU Siol Kandis, lalu nya sebengkah ari program Biro Indu taun 2015.
“Belajar ngaga kereban ngemajikka diri ari leka marik kena ngaga gelang enggau antin sebengkah ari aktiviti kami taun tu.
“Dikena nempa penemu enggau pengelandik diri dulu, kami belajar ngena leka marik baka mutiara plastik.
“Berindik ari pemujur kelas tu, aku merambu muka baru kelas tu ila tang deka ngena leka marik ti manah agi tauka bekualiti. Lalu asil ke digaga nya deka dijual dikena ngiga belanja Biro,” ku iya ti mega pengajar kelas nya.
Bejaku baru iya madah, kelimpah ti ari sebengkah aktiviti Biro Indu nya, tuju kelas belajar ngaga kereban ngemajik diri ngena leka marik mega dikena ngerapitka kaul entara kaban Biro.
Taja pia, iya ngarapka kelas belajar ngaga kereban ngemajikka diri ari leka marik deka muka peluang ngagai raban orang indu di Genturung Pendiau Siol Kandis muka dagang diri empu.
“Aku ulih ngasaika penguntung ari ngatur kelas tu amat besai iya nya raban orang indu ulih muka dagang ari rumah nengah chara bejualka kereban ngemajikka diri baka gelang enggau antin ari leka marik.
“Ari tu sida ulih ngiga belanja ke diri empu kelimpah ari ulih mantu laki ngiga belanja ke ruang bilik diri.
“Diatu aku bisi ninga sekeda kaban biro ti nyereta kelas tu nyau udah bisi orang mesan deka meli kereban ngemajikka diri ke digaga sida,” ku iya.
Lebuh ditanya peneleba iya ba pengawa begagaka kereban nya ari leka marik, iya madahka diri ngajar seraya belajar.
Aku berengkah ari kosong, tang laban lebuh ti beratika chara lalu bisi peluang dikemansangka dia aku belajar ke diri empu sereta bekunsi pengelandik tu enggau raban biro, ku iya.