Ahmad Lai, Rosey bela setuju, genturung menua nya kaya ba pemanah rampa sereta tau bendar matak dagang temuai
PENYADI ASAL: Pangka gelumbang tu udah nempa pemanah dinding batu nyadi penyelai ke unik.
MIRI: Peranak menua Sarawak patut berasai temegah ati sereta beterima kasih laban menua kitai tu ngembuan rampa menua ti manah.
Naka ke diatu, palan rampa menua tu apin dikereja lalu bedau ulih matak pemansang dagang temuai.
Baka di Bekenu, garis pantai ari Pantai Paliau nyentuk ke Pantai Trusan ulih dikemansang nyadi palan dagang temuai endur belepa baka Main Asal, Pengawa Bejalai Neresa Kampung seraya ngemataka pemanah Rampa Menua.
Kaban Parlimen Sibuti Ahmad Lai Bujang, bepun ari penelena iya ke udah suah bejalai neresa menua nya madah, rampa menua nya endang amai manah.
“Sebedau nyadi YB, aku kala bejalai neresa menua tu bisi tiga kali lebih agi ngambar pemanah rampa menua ditu. Begulai enggau raban orang ti rinduka pemanah rampa menua, sida udah bejalai neresa kampung ke enda jauh ari nya, seraya ngambar utai ke idup baka indu utai ke nemu ngerayap tauka terebai ngambi bisi dikena ngaga gambar latar poster enggau kalendar,” ku iya madah ngagai pemerita ari Borneo Post lebuh maya bekunsika pengawa neresa kampung dia.
Kelimpah ari nya, iya madah, menua tu mayuh ngundan bemacham utai tumbuh sereta jelu siga.
“Pemadu manah iya nya batu ti ngembuan gamal ke nyelai sereta penuduk batu tau nyadi palan ke engkeman alai raban geologi ngaga pansik pasal batu nya.
Raban ti rinduka pengawa nyelam patut ngambi peluang tu laban ba menua tu mayuh macham batu karang ke ulih dipeda sida.
Iya mega bisi pengandal ati enti sema menua tu dikemansang ngena chara ti betul, iya deka mai pemanah ngagai pengawa dagang temuai di sitak mit Bekunu.
Pia mega, iya madahka diri deka meri sukung seratus peratus ngagai peranak menua nya sama bela ngambi peluang enggau insiatif dalam pengawa ngelakuka palan dagang temuai dia.
“Peranak menua ba sitak tu endang dekaka pemansang lebih agi ba pengawa dagang temuai ngambika bisi dikena nambahka penatai pemisi ruang bilik sida, ke tau nyungkak pemanah pengidup sida.
“Sida tu mega sanggup ngena belanja diri empu kena ngaga rumah nyemilik nengah program ‘Homestay’ sereta perengkaguna bukai ti dikemerat ngambika ulih matak temuai nyengkaum pakej ke manah sereta murah.
Pengari rayat (ADUN) sitak Bekenu Rosey Yunus udah besetuju enggau penemu Ahmad Lai ti madah, genturung menua nya ngembuan ‘potensi’ dikemansangka nyadi palan dagang temuai.
“Aku berasai temegah ati ngagai peranak menua ditu ketegal sida sanggup bejalaika tanggungpengawa ke manah kena nyungkak pemanah palan nya nyadi sebengkah ari palan dagang temuai. Berebak enggau nya, mayuh pengawa udah diperambu kena ngemansangka menua nya seraya ngayanka penyiru ba Adat enggau Main Asal bansa Kedayan ke tau bendar matak dagang temuai.
Baka orang bukai, iya mega udah nganggarka deka nembuka projek dagang temuai ari perintah mungkur belanja bejuta ringgit ari dikena ngemanahka agi palan dagang temuai ba Pantai Bungai baka perengkaguna mensia mayuh.
Naka diatu, projek ke benung ba peringkat ke satu udah mujur dikereja lalu udah tembu urung 80 peratus.
Nitih ke pelan keterubah, pantai tu deka dikemansang enggau perengka baka palan penyangkai kapal temuai, restoren pemakai ari asil tasik, palan endur bebelika barang, rumah temuai, palan pengawa adat enggau main asal, sereta palan penyangkai perau.
Sekeda ari orang ke nyadi malin temuai, Supri Kamit madah, sida bisi bejalaika pengawa ngelakuka dagang temuai nengah sebengkah program ti dikumbai ‘Ekpidisi Peturun Lupuk’.
Iya madahka pakej ‘ekpedisi’ tu ari menua Paliau ngagai Trusan, udah dimunka ngagai peranak menua nya enggau raban temuai berengkah ari taun nyin kemari.
“Expidisi tu engkeman enggau raban orang ti rinduka pengawa bejalai sereta enchabar sida.
“Bisi semilan iti ‘check point’ disediaka dalam pakej tu, berengkah ari Kuntum, Batu Bajanji, Lubuk Kasau, Tanjung Batu, Kuala Jemaah, Batu Bandia sereta adan ba Tanjung Layang ba ,menua Trusan.
Sekeda ari palan ke tau narit ati baka bejalai neresa rampa menua, meda pemanah gamal sereta rintai batu baka Batu Layang enggau Batu Bendera, niki bukit, pengawa ngelantangka ati ba palan ai terejun enggau pengawa nyelam.
BA RENGGAT KETERUBAH: Pengawa ngemansangka pemanah perengkaguna program nyelilik di Tanjung Kampung Bungai, naka ke diatu udah mujur urung 80 peratus.