KUCHING: Kepala Menteri Datuk Patinggi Tan Sri Adenan Satem madah, perengka penyambung nuju lebih 30 bengkah Taman Negara di Sarawak deka dikemanah.
Ku iya pengawa nya ulih nyaup nambah penatai temuai ke Sarawak lalu nyaup nambah penatai pemisi nengeri ba industri dagang temuai.
“Semina nengah atur penyambung ke manah kitai ulih ngelakuka Taman Negara ke dikemisi kitai ngagai temuai ari menua luar.
“Awak tu patut diperebut ketegal Taman Negara kitai ngembuan mayuh utai tumbuh enggau utai idup ke nyelai ti disadang ulih matak temuai datai ngemata,”ku iya rambau bejadi Sarawak Tourism Forum ditu, kemari.
Iya nambah, pengawa ngaga Jalai Pan Borneo ke disadang tembu dalam timpuh 7 taun ke deka datai mantu nyendiaka atur penyambung ngagai semua Taman Negara.
Ngenang kaul ke sama, iya ngelalau ejensi ke bekaul enggau pengawa nyaga Taman Negara anang sesekali nutup kampung galau nya ari ditama temuai.
Ku iya, Taman Negara diintu ngambika mensia mayuh ulih meda utai tumbuh enggau utai idup ke udah jarang dipeda agi.
“Taman Negara ditumbuh ngambika meri awak ngagai mensia mayuh ngemata utai tumbuh enggau utai idup ke alai sekeda nya bisi bejalaika pansik.
“Nutup Taman Negara ari ke dilawa temuai enda ulih diterima akal,”ku iya.
Dulu agi ari nya, Menteri Dagang Temuai Datuk Amar Abang Johari Tun Openg ba jaku pengelalu madah industri dagang temuai deka majak ngerembai dalam timpuh 5 taun ti deka datai.
Berindik ari nya Abang Johari ngansak raban penyereta forum bejuraika chara ke pemadu engkeman dikena napi pinta industri nya.
Ku iya, teknologi ke dikemisi jeman ke diatu patut dikena enggau naka pemanah kelebih agi ba atur ngelaku tetiap palan dagang temuai.
“Chara ngelaku tetiap palan dagang temuai mega patut diperunding rambau forum tu.
Engka chara ke suah dikena ngelamatu udah enda engkeman agi,” ku iya.