Dikena nyeliahka penanggul Bup Kudus ditanka Opis Menteri Dalam Menua (KDN) ti kala nyadi sebedau tu
KUCHING: Ketegal rapas penemu sentang atur chara mai Bup Kudus tama ngagai menua tu,pengimport enggau Opis Kandang Menua udah betapi enggau penanggul Bup Kudus ditanka Opis Menteri Dalam Menua (KDN).
Menteri ba Opis Menteri Besai Tan Sri Datuk Seri Panglima Joseph Kurup madah, enda lama agi bisi Prosedur Operasyen Setindit (SOP) ke deka dikemanahka agi dikena meri penerang ngagai pengimport sereta Opis Kandang Menua.
“Nya kebuah aku datai ditu, meri penerang bekaul enggau atur chara mai tama bup jalai pengarap, nengah pintu penama menua tu,” ku Joseph seraya madahka diri deka ke Sabah kena 24 April mega, nerangka pasal pekara nya.
Ku iya,penerang tu beguna amat laban ukai mudah ngaga pemereti ati bekaul enggau atur perintah dikena ngaul rayat ukai semina ke bepengarap Keristin, tang mega ari pengarap bukai ti sama bela enda tau enda nitihka undang-undang tu.
“Perintah enda ngayahka perengka pupu bansa tauka jalai pengarap.
Pekara bekaul enggau sensitiviti tu bisi ditulis dalam Resolusyen 10/20.
“Nengah resolusyen nya aja ulih mulaika pengarap ngagai mensia mayuh baru, iya nya Perintah Barisan Nasional (BN) Menteri Besai seruran ngelalau kami nyaga Konstitusyen Perintah Besai.
Pekara ke udah ditulis dalam Konstitusyen Perintah Besai enda tau enda dijaga, lalu siti ari pemerat nya, ngenukuka peneka seiku nitihka pengarap iya empu,” ku iya.
Ku Joseph baru, bedau lama tu tadi bisi nyadi penanggul ketegal penyilap mai tama perengka jalai pengarap ari menua luar.
“Nya alai, kami (Perintah) nandu baru, atur mai tama bup pengarap mungkur semua jalai pengarap bukai lalu ukai semina Keristin aja, baik nya Islam, Hindu tauka Buddha, enda tau enda nitihka atur nya,” ku iya.
Ku iya, Perintah sereta Menteri Besai bebendar beratika Resolusyen 10 /20 sereta ngetanka rayat ke bepengarap Keristin, ngambika sida iya tau ngaga pengawa sida nitihka pengarap Keristin empu.
Dalam Resolusyen 10 /20, perintah enda nagang ngimport sereta ngena Bup Kudus dalam Jaku Melayu sereta bup pengarap Keristin bukai.
“Nya alai, naka ke diatu di menua kitai sigi bisi SOP ke patut dikena tang SOP nya deka dikemanahka agi ngambika iya terang sereta ditemu semua ke deka mai Bup Kudus tama ngagai menua tu, nyengkaum Opis Kandang Menua ti bejalaika pengawa sida.
“Laban bisi sekeda pemesai ba KDN nya rapas penemu pasal SOP tu, nya alai diatu kami deka nerangka ngagai sida iya,” ku iya.
Nya alai, ku iya lebuh bisi penyarut ke nyadi bedau lama tu tadi ke alai seiku ari Sabah ti mai Bup Kudus tama ngagai menua tu, iya ditan laban Bup Kudus ke dibai iya nya bisi ngena leka jaku ‘Allah’.
“Enti sema orang madah ditan ketegal nagit seraban orang, nya ukai berita ke amat.
Sebedau mai tama perengka jalai pengarap tu tau betanya dulu ba sida Kastam tauka KDN, laban pekara ke bekaul enggau Keristin tauka pengarap nya pekara ke sensitif tauka bisi begunaka permit tauka enda, ” ku iya.
Taja pia, perintah meri pengelunggar taja pan leka jaku ‘Allah’ bisi dalam Bup Kudus, tang nya semina ulih dikena di Sabah enggau Sarawak.
“Nya alai, baka SOP tu, nadai SOP ke baru deka diganti.
Kitai agi ngena SOP ke lama, tang dikemanahka agi ngambika mensia mayuh mereti pasal SOP tu.
Sama bisi ngulu atur pengawa nya kemari, Sekretari Nyelak Teks Al-Quran KDN Hashimah Nik Jaafar, Chairman Gerempung Gerija Sarawak Revd Dr.
Justin Wan, Direktor Opis Penyerakup Bansa enggau Integrasyen Nasional, Diwana Azool.