SUPP enda diberi peluang bepilih ba semua 19 iti penuduk maya PRN ila

0

KUCHING: Chairman Parti Tindakan Demokratik (DAP) Sarawak Chong Chieng Jen entaruh RM1 enggau Parti Sa’ati Rayat Sarawak (SUPP), ke alai parti nya enda diberi peluang bediri di semua 19 iti kerusi sida iya maya Pengawa Bepilih Kunsil Nengeri (PRN) ti deka datai tu ila.

“Enti SUPP ulih ngetanka hak sida iya bediri ba 19 kerusi nya, aku deka rugi RM1 lalu aku empu deka mai duit ti dientaruh ngagai Indu Opis parti nya,” ku iya madah ba aum media ba opis DAP nengeri ditu kemari.

Taja pia, Chong nadai madahka penyampau kerusi ke dipelaba deka diungkupka SUPP tang ku iya, enda semua 19 iti kerusi baka ke dipadah presiden parti nya, Senator Professor Datuk Dr Sim Kui Hian.

Kaban Kunsil Nengeri (ADUN) Kota Sentosa ke mega Kaban Parlimen Bandar Kuching nya madah, iya arap endar SUPP enda diberi semua 19 iti kerusi nya laban ke besemekih enggau Parti Rakyat Bersatu (UPP).

“Taja pan parti udah netapka endur bediri ba semua kerusi nya, aku berani (entaruh), nya enda ulih digaga sida,” ku iya.

Iya madahka SUPP ngembuan rikod sereta sejarah nyadi parti ke enda ulih ngetanka penetap sida.

“Ambika chunto maya taun 1978, semua parti SUPP ngaga pemutus ngena lambang parti maya Pengawa Bepilih Besai taun 1978 tang ukai lambang dachin.

Sekreteri Besai maya nya (niang Tan Sri Stephen Yong) madah logo parti mandangka (penaluk enggau pengering ) parti sida ke alai sida enda tau ngena kelai parti tang udah nya, ba taun ke sama mega, sida iya ngena lambang dachin,” ku iya.

Lebuh mantaika lambar surat berita ti nyebut niang Yong sereta lambar surat berita ti digaga Sim bedau lama tu tadi, Chong madahka, nya seiti chunto rikod sereta sejarah parti nya ke nadai ngetanka penetap sida iya tang nundukka peminta Kepala Menteri taja pan ukai pemutus parti.

“Nya alai, taja sida ngaga pemutus deka bediri ba 19 iti kerusi tang aku arap endar sida enda ulih bediri ba semua 19 iti kerusi lalu udah nya ila, semina nerima penyampau ke diberi Adenan (Kepala Menteri Datuk Patinggi Tan Sri Adenan Satem) ngagai sida,” ku iya.