Dikarang Chris Bishop//
MERI PENERANG: Uggah bejaku ngagai pengarang berita seraya didinga Wan Junaidi (kanan).
KUCHING: Kaunsil Minyak Sawit Malaysia (MPOB) netapka tetiap buah kilang sawit di serata Sarawak patut ngerikod nama penyual buah (tandan) sawit (BTS) berengkah ari diatu.
Menteri Kebun Bedandang Besai enggau Komoditi, Dato Sri Douglas Uggah madah, atur baru tu dikena nentuka semina orang ke ngembuan lisin sah aja dikemendar nyual BTS sereta dikearap ulih ngurangka kes enchuri.
“Dulu agi ari tu, kilang sawit semina dipinta nganjung riput sentang penyampau BTS ke dibeli ari penyual tauka pengumpul buah sawit.
“Diatu kitai minta tetiap buah kilang sawit nganjung rikot nama penyual nyempulang penyampau BTS ke dibeli,’ku iya ba seiti aum pengarang berita pengudah ngulu aum isu sentang kes enchuri BTS di Sarawak.
Iya nambah, atur baru dikena pengudah kes enchuri BTS di mengeri tu majak nyadi ti mungkur 18,000 hektar kebun sawit.
Taja pan enda madah penyampau pengerugi, Uggah netap MPOB deka bejalaika atur ti patut ngambika kes tu enda nyadi agi.
“Kami beratika pekara tu enggau berat ke alai penyampau rega BTS ke dichuri chukup besai lalu enggai ngelakka nya majak nyadi. Berindik enggau nya, aku ngelalau semua orang ke bisi kaul enggau industri kebun sawit baka raban pekebun mit, pengumpul buah sawit enggau kilang sawit meri kerejasama ngagai perintah, anang meli BTS churi,’ku iya.
Nitihka rikot berengkah ari Januari ngagai Mac 2015 ku Uggah, 82 riput sentang kes churi BTS udah dirikod di nengeri tu.
Ba taun 2014, 173 iti kes udah dirikod ke tebal agi nyadi di Miri, tandu iya.
Nambahka nya, iya netapka Ops Sawit Kenyalang ke udah dilanchar kena 1 Julai 2014 nyentuk bulan Disember 2014 sekali agi udah dilancharka baru kena 2 April 2015 tu tadi.
“Asil ari operasyen tu, kitai udah ngukum penyual enggau kilang sawit ti dipelaba meli BTS ari pemekal ke bisi kaul enggau kes enchuri sawit.
“Sekumbang Ops sawit Kenyalang 2014 kitai udah ngeluar 278 iti kompaun enggau 41 iti ‘surat madahka kebuah’, ungkup pengawa ngantung lisin.
“Ari penyampau nya MPOB udah nginsil 3 iti lisin orang dagang iya nya di Miri, Sibu enggau Samarahan kelimpah udah ngantung 24 iti lisin,’ku iya.
Uggah ngelalau pekebun mit ke bedau bisi lisin berengkah ngulihka lisin nyual ari MPOB diatu ke alai lisin nya ulih tembu dalam timpuh seminggu aja.
Bela bisi ba aum nya, Sapit Menteri Dalam Menua Dato Sri Wan Junaidi Tuanku Jaafar enggau Sekretari Mendam Opis Menteri Pemansang Tanah Datu Jaul Samion.